2018 сылга өрөспүүбүлүкэ эмтиир тэрилтэлэрэ “Кыһамньылаах поликлиника” стандартка көһөрүллүбүттэрэ дьоһун суолталаммытын СӨ Доруобуйа харыстабылын министиэристибэтин коллегиятыгар бэлиэтээтилэр.
edersaas.ru
Бу стандарт көмөтүнэн поликлиникалар, балыыһалар регистратураларын үлэлэрин тускула уларыйда. Аныгы эмтиир тэриллэр эбилиннилэр, хааччахтаммыт доруобуйалаах дьоҥҥо табыгастаах эйгэ оҥоһулунна. Бу хайысхаҕа өрөспүүбүлүкэ доруобуйатын харыстабылыгар элбэх үлэ ыытылынна.
“Кыһамньылаах доруобуйа харыстабыла” бырагырааманы олоххо киллэрии чэрчитинэн, 2016 сыллаахха эмтэнээччилэри өйүүр уонна арыаллыыр сулууспалар (ол иһигэр, 39 оройуоннааҕы, 10 өрөспүүбүлүкэтээҕи уонна 10 куораттааҕы) тэриллибиттэрэ.
Искэни эмтиир сулууспа үлэтин салгыы сайыннарар сорук турар. Бу хайысхаҕа үлэ актыыбынайдык барар. Кэнники үс сылга бу уодаһыннаах ыарыыны эрдэ булуу көрдөрүүлэрэ тубустулар. Өскөтүн 2016 сыллаахха ыарыһахтар 18 бырыһыаннара эрдэ булуллар буоллаҕына, билигин бу сыыппара 46 бырыһыаҥҥа тэҥнэстэ. Ону сэргэ, уопсай ыарыыны сэрэтэр дьаһаллар хаачыстыбалара биллэ тубуста.
Икки сыл устатыгар “Сыыппаралаах контур” бырайыак үлэлээтэ. Ол түмүгэр, өрөспүүбүлүкэҕэ 252 балыыһа уонна быраас амбулаторията түргэн сибээс ханаалынан туһанара хааччылынна. Билигин дуогабардары түһэрсии түмүк түһүмэҕэ хаалла.
СӨ Доруобуйа харыстабылын министиэристибэтэ оҥорбут “Былыттаах поликлиника” боруобалыыр бырайыагын көмөтүнэн эмтэнээччилэр уопсай медицинаҕа сыһыаннаах боппуруостарга телемедицинскэй сүбэ-ама ылар кыахтаннылар.
Надежда ЕГОРОВА, “Саха сирэ” хаһыат, edersaas.ru