Маны аах Эдэр саас

Доҕордоһуу марафонугар үөрэнээччилэр кыттыахтара

Бүтүн Арассыыйатааҕы «Эрэгийиэннэр икки ардыларынааҕы доҕордоһуу марафонугар» оскуола үөрэнээччилэрэ кыттыахтара.

«Көр, бу Арассыыйа!» оскуола үөрэнээччилэригэр видеонан аккырыыккалар күрэстэрин тэрийээччилэр аахсыйа тэрийдилэр. Итинэн Саха сирин олохтоохторо куйаар ситиминэн ыытыллар кэмпириэнсийэҕэ бэйэлэрин саастыылаахтарын кытары көрсөр уонна дойду хайа баҕарар муннугар эҕэрдэлэрин тиэрдэр кыахтаннылар. Доҕордоһуу марафона СӨ оҕо уопсастыбаннай хамсааһынын күнүгэр сыһыары туттулар.
«Көр, бу Арассыыйа!» бырайыагы тэрийэр санаа өрөспүүбүлүкэҕэ оҕо хамсааһынын көхтөөх кыттааччыларын кытары көрсүһүүлэртэн биирдэстэригэр, икки сыллааҕыта, күөрэйбитэ. Бу кэҥээбитэ, улааппыта суолталаах. Аны билигин видеокроссинг Арассыыйа бары эрэгийиэннэриттэн оҕолору түмэр. Биһиги дойдубут сүҥкэн, манна уһулуччулаах дьон олорор. Үөрэнээччилэр дойдубут  бары норуоттарын баай култуураларын көрөр кыахтаахтар«, — диэн этэр СӨ Ил Дархана Айсен Николаев.

Ахсынньы 6-7 күннэригэр, бырайыакка кыттар ханнык баҕарар хамаанда онлайн-көрсүһүүгэ сурутан, атын эрэгийиэн хамаандатын кытары көрсүһүөн сөп. Кинилэр манна салгыы хайдах сибээстэһэри быһаарсаллар уонна хаһан баҕарар бэйэлэрэ сэһэргэһэр, санаа атастаһар кыахтаналлар.

Бэлиэтээн эттэххэ, «Көр, бу Арассыыйа!» күөн күрэскэ оҕолор Арассыыйа араас муннугуттан эрэгийиэннэрин туһунан сырдатан, билиһиннэрэн, кэпсээн видео аккырыыккаларынан атастаһаллар.  Быйыл барыта 18 000-ттан тахса үөрэнээччи кыттыбыта бэлиэтэнэр. Күрэскэ видеороликтар сэтинньи 21 күнүгэр диэри ылыллыбыттара. Оттон билигин lookitsrussia.ru.  саайтка куоластааһын ыытыллар. Куоластааһыҥҥа номнуо 86 тыһ. тахса киһи кыттыыны ылбыта бэлиэтэнэр. Итинтэн 13 тыһ. Саха сириттэн кыттыбыт хамаандалар иһин куоластарын биэрбиттэр. Бу ахсынньы 9 күнүгэр диэри ыытыллар.

Куоластааһын түмүгүнэн алта кыайыылаах хамаанда тахсыахтаах. Хас биирдии сааһынан категорияҕа биирдии (Саха сириттэн үс видеоролик; 3 — атын эрэгийиэнтэн) хамаанда буолар. Бөлөх кыайыылаахтарыгар смартфоннар туттарыллаллар. Ону сэргэ, куонкурус партнердара алта анал номинациянан бастыҥ үлэлээхтэри наҕараадалыахтара. Кыайыылаахтары ахсынньы 14 күнүгэр иһитиннэриэхтэрэ.

Санатан эттэххэ, «Көр, бу Арассыыйа!» күрэс тэрийээччитинэн «Юные якутяне» өрөспүүбүлүкэтээҕи ресурснай киин буолар. Күөн күрэс РФ Үөрэххэ министиэристибэтэ, ыччат дьыалаларыгар федеральнай ааҕыныстыба (Росмолодежь), «УК «ИНТЦ «Сириус» АУо, Нуучча географическай уопсастыбата, «Знание» Арассыыйа уопсастыбата, СӨ Үүнэр көлүөнэ тус сыаллаах пуондата, «Это моя земля» бырайыак, уо.д.а. өйөбүллэринэн ыытыллар.

0
0
Telegram @edersaas20