23 улуустан сэттэ сүүстэн тахса киһи сэлэлээн хаамта

Сэрэйиллибитин курдук, тэрээһини дьон-сэргэ улаханнык долгуйа күүппүтэ билиннэ. Олус үчүгэйдик тэринэн, өрө көтөҕүллэн кыттыыны ылбыттарын СӨ Култуура, духуобунай сайдыы министиэристибэтэ сөҕөн, хайҕаан бэлиэтиир. Чопчуламмытынан, сэлэлии хаамыыга 23 улуустан 700-тэн тахса киһи кыттыыны ылбыта бэлиэтэннэ.

Манна даҕатан бэлиэтээтэххэ, бу тэрээһин өрөспүүбүлүкэҕэ биир саамай күүтүүлээҕинэн уонна киэҥ хабааннааҕынан биллэр. Ол гынан баран, быйыл хоруона хамсыгынан хааччахтыыр эрэсииминэн, сэлэлээн хаамыы онлайн ситиминэн барда. Бу хаамыыны «Якутия мастеровая» быыстапка арыллыытыгар уонна «Саха» НКИХ биэриитигэр көрдөрдүлэр. Маны сэргэ, видеону култуура министиэристибэтин ю-туб ханаалыгар көрүөххэ эмиэ сөп.

«Биһиги өрөспүүбүлүкэбит улуустарыгар сэлэлээн хаамыыны видеонан устубуттарын барытын бииргэ түмтүбүт. Уран тарбахтаах маастардар тигиилэрин, национальнай көстүүм маанытын, кэрэтин, дьон-сэргэ өрө көтөҕүллэн кыттыытын көрүҥ, сэргээҥ«, — диэн СӨ Култуура уонна духуобунай сайдыы миниистирин бастакы солбуйааччы Владислав Левочкин инстаграмҥа бэйэтин страницатыгар суруйар.

Норуот маастарын күнэ быйыл кулун тутар 3-6 күннэригэр очнай-заочнай киэбинэн ыытыллар. Бырааһынньыктыы тэриллибит тэрээһиҥҥэ көрсүһүүлэр, лиэксийэлэр, өрөспүүбүлүкэ уран тарбахтаахтарын быыстапкалара тэрилиннэ. Саха сирин норуотун уус-уран оҥоһуктарын  сайыннарыыга дьыалабыай былаһааккалар үлэлээтилэр. Дьыалабыай бырагыраама иитинэн «Сахабулт» концерн бырайыагын билиһиннэрии буолла, креативнай экэниэмикэни сайыннарыы кэнсиэпсийэтин дьүүллэстилэр. Ону сэргэ, «Администрирование грантовых конкурсов социальных проектов социально ориентированных некоммерческих организаций республики в сфере народных художественных промыслов» уонна «Продвижение региональных брендов и охрана интеллектуальной собственности» тиэмэлэргэ сессиялар буоллулар. Оттон СӨ художественнай түмэлигэр худуоһунньук, этнограф, кыраайы үөрэтээччи М.М.Носов иллюстрациятынан сахалыы оһуордаах-мандардаах үтүлүгү тигиигэ маастар-кылаас ытыллбта болҕомтону ылла.

Норуот маастарын күнүгэр анаммыт тэрээһин үөрүүлээх чааһа А.Е.Кулаковскай аатынан норуоттар доҕордоһууларын дьиэтигэр ыытылынна. «Саха» НКИХ режиссер С.Андреев «Кузнецы земли Олонхо»  документальнай киинэ көрдөрүлүннэ.