Доруобуйа харыстабылын министиэристибэтэ социальнай ситимнэринэн киирбит ыйытыыларга хоруйдуур. Өрөспүүбүлүкэҕэ коронавируһу утары вакцина төһө ахсааннаах кэллэ диэн ыйытыы киирбитэ.
Ханнык эрэгийиэҥҥэ хас вакцина тиксэрин РФ доруобуйа харыстабылын министиэристибэтэ быһаарар. Быһыы оҥоһуллан тахсан иһэринэн, эрэгийиэннэргэ аттаран, траҕаталлар.
Ыам ыйын 12 күнүнээҕи туругунан, өрөспүүбүлүкэҕэ барыта 136 084 устуука быһыы кэлбит. Ол иһигэр, “ГамКовидВак” быһыы – 112 804 устуука, “ЭпиВакКорона” — 23 280 устуука кэлбит.
Билигин саппаас быһыы баар буолан, вакцинация хаамыыта тэтимнээхтик ыытыллар. Олорор сиргитинэн сыһыарыллыбыт поликлиника төлөпүөнүгэр эрийэн, эбэтэр “Госуслуги” портал нөҥүө суруйтарыахха сөп.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru