Бэс ыйын 24 күнүн сарсыардааҥҥы туругунан өрөспүүбүлүкэ үрдүнэн 22 ойуур баһаара күөх дуолу мэҥиэстэр. Барыта 29673,8 гектар иэннээх сир былдьаммыт.
Уус Маайаҕа 4, Ленскэйгэ 2, Алдаҥҥа 2, Томпоҕо 4, Мииринэйгэ 5, Ньурбаҕа, Орто Халымаҕа, Нерюргригэ биирдии уонна Өлүөхүмэҕэ 2 ойуур баһаардара турбуттара бэлиэтэнэр.
Ааспыт сууккаҕа Ленскэй, Уус Маайа уонна Томпо оройуоннарыгар 5 ойуур баһаара турбута биллибит, барыта 196 гектар иэннээх сири-уоту мэҥиэстибиттэр. Билиҥҥи туругунан 17 ойуур баһаара умуруоруллар. Умуруорууга «Авиалесоохрана» 512, ойуур хаһаайыстыбатын 137 уонна СӨ Ыксаллаах быһыыга-майгыга министиэристибэтин 2 исписэлиистэрин сэргэ 15 олохтоох дьон кытталлар, 13 анал тиэхиньикэ үлэлиир. Ааспыт сууккаҕа Томпо, Ленскэй, Үөһээ Халыма оройуоннарыгар 4 ойуур баһаара умуруоруллубут, Ньурба, Ленскэй, Орто Халыма, Томпо, Өлүөхүмэ оройуоннарыгар 6 уот тохтотуллубут. Ан-26 «Циклон» сөмөлүөт ардаҕы ыҥырар анал көтүүлэри оҥорор.
СӨ Экологияҕа министиэристибэтэ Саха сирин олохтооругар уонна ыалдьыттарыгар ойуурга сылдьаргытыгар уоту сэрэхтээхтик туһанаргытыгар сүбэлиир, ыҥырар. Ойуур баһаара туран эрэрин биллэххитинэ, көрдөххүтүнэ, 8-4112-44-74-76 диэн эрэгийиэннээҕи диспетчэргэ эбэтэр 8-800-100-94-00 диэн анал нүөмэргэ быһа эрийэн тиийиэххитин сөп.