Бырабыыталыстыба бэрэссэдээтэлин бастакы солбуйааччы Кирилл Бычков инфраструктурнай бүддьүөт кирэдьиитин ыларга өрөспүүбүлүкэ сайаапкатын оробуочай бөлөххө билиһиннэрдэ.
Кини иһитиннэрбитинэн, 7 инвестиционнай бырайыагы үлэлэтэргэ бу маннык 3%-наах 22,7 миллиард солкуобай суумалаах инфраструктурнай бүддьүөт кирэдьиитэ туһаныллыахтаах. Сайаапкаҕа Дьокуускайга уонна Нерюнгригэ тутуллуохтаах олорор дьиэ кыбаарталын инженернэй инфраструктуратын хааччыйыыга, Өлүөнэ өрүс муостатын, Нерюнгригэ олох-дьаһах хомунаалынай хаһаайыстыбатын эбийиэктэрин, Арктикаҕа атыы, айан кииннэрин тутууга, Национальнай мэдиссиинэ киинин хапытаалынай өрөмүөнүгэр, о.д.а. туттуллуохтаах.
Дьокуускайга “Воинская часть” кыбаарталга 264 кв.м. иэннээх олорор дьиэни тутуу Национальнай бырайыагынан олорор дьиэни тутуу көрдөрүүтүн толоруоҕа. Ону тэҥэ үлэ миэстэтин таһаарарга, уунан хааччыйыы, хомунаалынай ситим үлэтэ тупсарын хааччыйарга быһаччы туһалаах буолуоҕа.
Оробуочай бөлөх бу сайаапканы өйөтө. Сайаапка салгыы РФ бырабыыталыстыбатын эрэгийиэннэри сайыннарыы хамыыһыйатыгар көрүллүөҕэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru