Анкара университетын аспирана Умит Шахин саҥа тылдьыт туһунан санаатын үллэстэр
Cаҥа электроннай сахалыы-нууччалыы тылдьыт улахан болҕомтону тарта. Бу туһунан дьон-сэргэ санаатын үллэстэр.
Умит Шахин, Анкара университетын Билиҥҥи түүр тылларын салаатын аспирана, Турция:
— Соторутааҕыта интэриниэт ситимигэр сахалыы-нууччалыы электроннай тылдьыт сүрэхтэммитин көрбүтүм. Күн аайы көмпүүтэр нөҥүө Саха тылынан дьарыктанар, диссертация суруйар киһи быһыытынан хайдах оҥоһуллубутуй диэн “Эдэр Саас” саайтка киирэн көрдүм. Ити тылдьыт иннинэ sakhatyla.ru саайтка киирэн тыллары көрдүүр этим. Ол тылдьыт 70-с сылларга оҥоһуллубут нууччалыы-сахалыы уонна сахалыы-нууччалыы тылдьыттарга олоҕуран оҥоһуллубут этэ. Холобурдара ол тылдьыттартан ылыллыбыттар этэ. Мигалкин тылдьыта буоллаҕына, лексикология үөрэҕин састаабынан буолбакка, атыннык оҥоһуллубут.
Биир үчүгэйэ диэн, ханнык эмэ тылы суруйдаххына, ол тылы кытта ситимнээх атын тыллар, тыл ситимнэрэ эмиэ тахсан кэлэллэр. 50-ча тыл уонна тыл ситимин көрдөрөрө олус үчүгэй. Ону ааһан, сомоҕо домохтор, өс хоһоонноро эмиэ көстөллөр. Тыл үөрэхтээхтэрин көмөтүнэн лексикология үөрэҕэр олоҕуран сайыннарылыннаҕына, өссө элбэх дьон туһаныа дии саныыбын.
Билиҥҥи үйэҕэ тылы үөрэтэр, төрөөбүт тылын өссө үчүгэйдик үөрэтиэн баҕарар дьоҥҥо олус улахан үлэ буолбут диэн санааҕа кэллим. Көмпүүтэргэ сыһыаннаах эдэр ыччакка эмиэ туһалаах үлэ буолбут. Кыах баар буоллаҕына, баҕар, сотору кэминэн Мигалкин тылдьыта сыһыарыы быһыытынан төлөпүөннэрбитигэр эмиэ киириэҕэ. Ити курдук улахан үлэни оҥорбут киһиэхэ саха тылынан дьарыктанар тыл үөрэхтээҕин быһыытынан бэйэм эмиэ махталбын тиэрдэбин.
«Саха сирэ» хаһыат, edersaas.ru
Хаартыска — vsiem.ru