Халаан уутун кутталыттан 21 оройуоҥҥа сүөһүнү-сылгыны үүрдүлэр. Саха сиригэр 21011 сүөһүнү уонна 27010 сылгыны үрдүк сиргэ көһөрдүлэр.
Саха сиригэр халаан саҕаланыыта сүөһүнү уонна сылгыны уу ылбат куттала суох сиригэр үүрэн илдьэллэр. Амма, Алдан, Таатта, Бүлүү, Өлүөнэ, Дьааҥы, Халыма өрүстэргэ сааскы халаан уутун куттала суох аһарыы тэрээһиннэрин чэрчитинэн үрдүк учаастактарга 21011 сүөһү (былаантан 60,4%), 27010 сылгы (былаантан 80,2%) үүрүлүннэ.
Ыам ыйын 24 күнүнээҕи туругунан өрөспүүбүлүкэҕэ сүөһүнү-сылгыны үрдүк сиргэ үүрэн илдьии Амма, Чурапчы, Таатта (Амма өрүс), ону тэҥэ Өлүөхүмэ, Хаҥалас, Мэҥэ Хаҥалас, Нам, Уус Алдан уонна Дьокуускай к (Өлүөнэ эбэ), Алдан, Уус Маайа, Томпо, Уус Алдан, Нам (Алдан эбэ), Сунтаар, Ньурба, Үөһээ Бүлүү уонна Бүлүү (Бүлүү эбэ) улуустарыгар тэрилиннэ. “Ыам ыйын 24 күнүнээҕи туругунан Саха сирин Тыатын хаһаайыстыбатын министиэристибэтин хонтуруолугар халаан туруга болҕомтоҕо тутуллар: Дьокуускай к. – Тулагы сэл. уонна Тулагы-Киллэм нэһилиэгэр Капитоновка сэл., Уус Алдаҥҥ — Суотту уонна Бороҕон нэһилиэктэрэ, Нам улууһугар — Үөдэй, Партизан, Хатыҥ Арыы, 2 Хомустаах, Арбын нэһилиэктэрэ”, — диэн өрөспүүбүлүкэ тыатын хаһаайыстыбатын миниистирэ Александр Атласов иһитиннэрдэ.
Улуустар дьаһалталарын, тыа хаһаайыстыбатын улуустааҕы управлениеларын өрөспүүбүлүкэ Тыатын хаһаайыстыбатын министиэристибэтин суһал штабын кытта ыкса үлэлэһэн үөскүүр балаһыанньаны кэтээн көрөллөр. Хас биирдии нэһилиэнньэлээх пуунунан чахчылар суукканы эргиччи саҥардыллаллар. Быстах тутар пууннарга сүөһү уонна сылгы аһылыгар сөп буолар саппаас аһылык баар. Бу быстах пууннарга халаан кэмигэр 165,2 туонна бурдук уонна 14,2 туонна концентрированнай аһылык көрүллүбүт. Күрүөнү-хаһааны өрөмүөннээтилэр.
Миниистир этэринэн, РФ ЫБММ Саха сиринээҕи салаатын кытта суһал бөлөх састаабыгар Тыа хаһаайыстыбатын министиэристибэтин сүрүннүүр тэрилтэлэрин үлэһиттэрэ киирдилэр. Маны сэргэ халааны этэҥҥэ аһардар туһугар 14 улуус сиригэр-уотугар халааны аһарыыга бэлэмнээх буолууга гидротэхиньиичэскэй тутуулары кэлимсэ чинчийии ыытылынна. Халаан кэмигэр анал тиэхиньикэ уонна оробуочайдар күн аайы бу уу ситимнэригэр дьуһуурунайдыыллар.
СӨ Тыа хаһаайыстыбатын министиэристибэтин пресс-сулууспата
Бэлэмнээтэ Женни Стрюкова
Хаартыска: тустаах саайтан