Култуура Сүрүн

«21-с үйэ 21 эдэр суруйааччыта» кинигэ сүрэхтэннэ

Эдэр суруйааччылар 13-с сүбэ мунньахтарын чэрчитинэн, »21-с үйэ 21 эдэр суруйааччыта» кинигэ сүрэхтэниитэ Национальнай бибилэтиэкэ историческай саалатыгар буола турар.

Бу халыҥ, дьоһун кинигэ ааспыт сыллардааҕы сүбэ-мунньахха бэлиэтэммит эдэр ааптардар айымньыларыттан таҥыллан оҥоһулунна. Поэзия, проза, драма, оҕо литературата, кириитикэ жанрдарынан таҥыллыбыт.

Кинигэ сүрэхтэниитигэр Саха сирин суруйааччыларын сойууһун бэрэссэдээтэлэ Наталья Харлампьева бэйэтэ литератураҕа хайжах кэлбитин туһунан кэпсээтэ. »Бу үлэ ситим салҕанарын, саха литературатын сайдар суолун омооно көстөрүн этэр. Бу үлэ алҕанарыгар, маннык мааны, дьоһун кинигэлэр тахса туралларыгар баҕарабын’‘, — диэтэ.

Кинигэни хомуйан, таҥан таһаарбыт эрэдээктэр Гаврил Андросов маннык этэр: »Биир сүбэ-мунньах чэрчитинэн тахсара сиикэй эбит, икки сүбэ-мунньахтан талан, көөнньөрөн оҥорор ордук. Аныгы саха литературатын эдэр мөрсүөнүн көрдөрөр кинигэ буолла», — диэн санаатын үллэһиннэ.

Үөрүүлээх тэрээһиҥҥэ бу кинигэҕэ киирбит ааптардар харда тылларын эттилэр. Кинилэр хоһоонноругар айыллыбыт ырыалар ылланнылар. Мария Андреева: »Маннык улахан ааттаах кинигэҕэ киирбиппитин да итэҕэйбэккэ сылдьабын. Бу үрдүк чиэс, саха литературатыгар үлэлиэ диэн эрэммиккитигэр махтанабын. Кинигэ аатыгар этиллибитинии, суруйааччы буолар санааны ыһыктыам суоҕа».


Ольга Янцен: »Аҕа көлүөнэ суруйааччылар эдэрдэри атаахтатар, бүөбэйдиир да курдуктар. Илдьэ сылдьан, сороҕор кириитикэлээн, сороҕор хайҕаан, өйүүллэрэ эдэр ааптардарга улахан суолталаах. Өйөбүллээх буолан, кынаппыт бөҕөргүүр».
Саргылаана Сандаар: »Бу ханна да суох, олус үчүгэй кинигэҕэ киирбит дьоллоох дьон эбиппит. Хас биирдии ааптарга улахан үлэ түмүгэ буолар’‘.

Ангелина Васильева, »Саха сирэ» хаһыат, edersaas.ru

Хаартыска: ааптар түһэриилэрэ.

 

 

 

 

 

 

 

 

1
0
Telegram @edersaas20