Маны аах Уопсастыба

Дьокуускайга 203-с түөлбэ олохтоохторо субуотунньуктаатылар

Дьокуускай куоракка 203 түөлбэ олохтоохторо саас аайы субуотунньукка тахсан, дьиэлэрин таһын хомуйар үгэстээхтэр.

Соторутааҕыта 1-кы куорпус олохтоохторо уонна бу түөлбэҕэ тутулла турар “Качели” эргиэн киинин тутар “Мичан” тэрилтэ үлэһиттэрэ тахсан, субуотунньуктаатылар. Дьиэлэр аттыларын эрэ буолбакка, аппаны эмиэ ыраастаатылар. Бу олохтоохтор уонна тэрилтэлэр бииргэ үлэлээһиннэрин бастакы холобура буолар. Урбаанньыттар тиэхиникэ, үлэлиир тэрил биэрэн, көмөлөстүлэр. Бу курдук бары куорпустар олохтоохторо тахсан, субуотунньуктууллар.

203 түөлбэ – биһиги уопсай дьиэбит, куоракка биир кэскиллээх оройуон буолар. Олус көхтөөх актыыптаахпыт, куруук интэриэһинэй бырайыактары толкуйдаан, олоххо киллэрэбит. Олохтоохтор бэйэлэрин өрөбүл күннэригэр тахсан, субуотунньуктууллар. Манна үлэлии эрэ буолбакка, бэйэ-бэйэлэрин билсэллэр, алтыһаллар, онон доҕордуу сыһыаны олохтуурга кыһаллабыт.

Субуотунньуктары таһынан куонкурустары, кэнсиэртэри, күрэхтэһиилэри, аһымал аахсыйалары тэрийэрбит үтүө үгэскэ кубулуйда. Туох эрэ түбэлтэ таҕыстаҕына да, олохтоохтор көмөҕө кэлэргэ бэлэмнэр, — диэн 203-с түөлбэ олохтоохторун актыыбын старостата Наталья Лукина этэр.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0
Telegram @edersaas20