Дьокуускай куорат 203-с түөлбэтигэр бииртэн-биир саҥа дьиэ дьэндэһэн, аҕыйах сылтан бэттэх дьонунан туола түстэ. Оҕо аймах даҕаны балачча элбэх. Хас даҕаны уһуйаан аһыллыбыт эбит буоллаҕына, оскуолалартан күн бүгүн соҕотох “Айыы Кыһата” гимназия үлэлии турар. Төрөппүттэр тутулла турар иккис оскуола быйыл аһыллар дуо, диэн туоһулаһаллар.
Дьокуускай куорат уокуругун дьаһалтатын уопсастыбаннаһы уонна сонуну киэҥник тарҕатар сириэстибэлэрин кытта үлэлэһэр департамен суруйарынан, бу күннэргэ СӨ Бырабыыталыстыбатын бэрэссэдээтэлин солбуйааччы Сергей Местников 203-с түөлбэҕэ тутулла турар оскуоланы баран көрбүт.
Үс мэндиэмэннээх, 5 тыһыынчаттан тахса кв. миэтэрэ иэннээх, 360 миэстэлээх кыһаҕа 1 кылааска оҕону киллэриигэ төрөппүттэртэн сайабылыанньаны, куорат атын оскуолаларыгар курдук, 2021 сыл муус устар 1 күнүттэн ылаллар. Дьокуускай куорат баһылыгын солбуйааччы Наталья Романова: “Гимназияҕа 2-11-с кылааска үөрэххэ лиссиэнсийэ толоруллубутун кэннэ ылыахтара. Лиссиэнсийэ, туһааннаах кэтээн көрөр уорганнар көҥүл биэрбиттэрин кэннэ, бэс ыйын 1 күнүгэр диэри толоруллуоҕа. Саҥа оскуолаҕа, бастатан туран, олорор сирдэринэн хапсар оҕолору ылыахтара” – диэн этэр.
Онон, 203-с түөлбэҕэ тутулла турар саҥа кыһа быйыл үлэҕэ киирэр, аны күһүҥҥүттэн оҕолору үөрэтиэхтэрэ.
“Саха сирэ” хаһыат, edersaas.ru