Дьокуускай куорат 203-с микро-оройуонугар хоболоох табанан айаннаан, Тымныы оҕонньор ыалдьыттаан ааста.
edersaas.ru
Киин куорат бу түөлбэтин 6-с уонна 7-с куорпустарын олохтоохторо олус көхтөөхтөр. Соторутааҕыта кинилэр тиэргэннэрин көрөр эппиэтинэстээх киһиэхэ тэлэбиисэр ылан бэлэхтээбиттэрин туһунан сонуну сэҥээрэн, РEN TV суруналыыстара анаан кэлэн устан, бу куорпустар олохтоохторо Арассыыйаҕа тиийэ аатырбыттара.
— Биһиги бииртэн-биир сонун сүүрээни олоххо киллэрэр дьоммут. Төрөппүттэрбит оҕолорун Тымныы оҕонньор кэлэн эҕэрдэлиэн баҕарбыттара. Биһиги 4-c подъездка Саҥа дьыллааҕы Почта дьааһыгын бэлэмнээбиппит. Оҕолор Тымныы оҕонньор кэлэн ыалдьыттаан барарыгар көрдөһөн сурук суруйбуттара. Биһиги «Аврора» УХ салалтатын кытта кэпсэтэн, оҕолорбутугар бэртээхэй бэлэҕи оҥордубут. Тымныы оҕонньор болдьообут чааспытыгар табанан хобо тыаһа доҕуһуоллаах айаннаан тиийэн кэллэ. Кырачааннар дьиэлэрин түннүктэриттэн Тымныы оҕонньору илэ көрөн үөрдүлэр аҕай, — диэн 6-куорпус ыстаарыстата Лидия Сыроватская санаатын үллэстэр.
Бэйэ-бэйэҕэ үөрүүнү бэлэхтии сырыттахха, кырдьык, тулалыыр эйгэҥ сырдык, кэрэ буолар буоллаҕа!
Елена ПОТОЦКАЯ, «Саха сирэ» хаһыат, edersaas.ru
Хаартыска: батсааптан