«203 микро-оройуоҥҥа 360 миэстэлээх иккис оскуола тутуута тохтотуллубут диэн сымыйа, олоҕо суох сурах», — диэн иһитиннэрдэ СӨ Тутуутун миниистирин бастакы солбуйааччыта Галина Новикова.
edersaas.ru
Кыһыҥҥы каникул кэнниттэн тохсунньу 18 күнүгэр саҕаламмыт тутуу үлэтэ бырааһынньык уонна өрөбүл күнтэн ураты тохтобула суох бара турар.
“Оскуола тутуута кыраапык быһыытынан баран иһэр, эбийиэк 2020 сыл ахсынньытыгар бүтэрэ былааннанар. Ыйыллыбыт болдьох кэһиллиэ диэн долгуйарга төрүөт суох. СӨ судаарыстыбаннай сакаасчытын сулууспата тутуу үлэтэ төһө хаачыстыбалаах баран иһэрин уонна эбийиэк кэмигэр туттарылларын хонтуруоллуур”, — диэн тутулла турар үөрэх кыһатын таһыгар суруналыыстары кытта көрсүһүүгэ миниистир солбуйааччыта быһааран биэрдэ.
“Бэдэрээтчит «Кинг — 95» ХЭТ лицензиятын былдьаабыттар үһү диэн олоҕо суох сымыйа сурах. Лицензията барыта баар. «Саха сирин тутааччыларын сойууһун» түмсүүтүн дисциплинарнай хамыыһыйатын мунньаҕын боротокуолун быһыытынан, «Кинг — 95» ХЭТ бэдэрээтчиккэ дисциплинарнай дьайыы миэрэтэ оҥоһуллубута. Ол миэрэ хапытаалынай тутуу эбийиэктэригэр баар кэһиини туоратыахха диэри тутууга, саҥардан тутууга, хапытаалынай өрөмүөҥҥэ саҥа дуогабары түһэрсиэ суохтаах диэн ис хоһоонноох. Бу миэрэ тутуу үлэтин ыытарга баар судаарыстыбаннай хантыраагы хайдах да таарыйбат.
Дисциплинарнай дьайыы төрүөтэ – СӨ судаарыстыбаннай сакаасчытын сулууспата тутууга баар кыра итэҕэһи булбута. Бэдэрээтчит ол итэҕэһи көннөрөргө үлэлэһэр, бу тутуу хаачыстыбатыгар, болдьоҕор хайдах да дьайбат. Баар итэҕэһи биир нэдиэлэ иһинэн көннөрүөхтэрэ”, — диэн эттэ кини.
Онон бэдэрээтчиккэ оҥоһуллубут дисциплинарнай дьайыы быстах болдьохтоох уонна сотору кэминэн уһуллуоҕа. Бу тутуу хаамыытыгар хайдах да сабыдыаллыа суоҕа. Ол туһунан СӨ Тутуутун министиэристибэтин пресс-слууспата иһитиннэрэр.
Хаартыска СӨ Тутуутун министиэристибэтин пресс-слууспатыттан
«Саха сирэ», edersaas.ru