Ил Дархан Айсен Николаев Петербурдааҕы экэнэмиичэскэй пуорум чэрчитинэн, РФ сыыппаранан сайдыыга, сибээскэ, маассабай коммуникацияларга миниистирэ Максут Шадаевтыын көрүстэ. Өрөспүүбүлүкэҕэ сыыппаранан сайдыы, электроннай өҥөлөрү киллэрии, оптоволоконнай лиинийэлэри тутуу, IT-салааны өйөөһүн туһунан кэпсэттилэр.
— Федеральнай бүддьүөт өйөөһүнүнэн, Арктика оройуоннарыгар 2025 сыл бүтүөр диэри оптическай лиинийэлэри киллэрэр былааннаахпыт. Оччоҕо улуустар кииннэрэ бары түргэн интэриниэккэ холбонуо этилэр, — диэн Айсен Николаев эттэ.
2019 сылтан Саха сиригэр интэриниэккэ холбуурга инновационнай уонна сыыппарана сайдыы бырагыраамата үлэлээн саҕалаабыта. Билигин өрөспүүбүлүкэ нэһилиэнньэтин 99%-на суотабай сибээскэ, интэриниэккэ холбонор кыахтаах. Кэнники сылларга 13 тыһыынча килэмиэтиртэн тахса уһуннаах оптоволоконнай лиинийэ тардыллыбыт.
2025 сылга Саха сирэ бүтүннүүтэ оптоволоконнай лиинийэнэн тардыллара күүтүллэр. Холобур, Тиксиигэ «Полярный экспресс» диэн уу аннынан барар магистральнай оптоволоконнай лиинийэ хобонуохтаах.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.