2025 сылга диэри Арктика оройуоннарыгар эргиэн-логистика кииннэрин тутуохтара
2025 сылга диэри Арктика 13 оройуонугар эргиэн-логистика кииннэрэ тутуллаллара былааннанар.
Бу сыалга федеральнай киинтэн 1 млрд.солк. кэриҥэ үп көрүллүбүт, ол иһигэр 753 мөл.солк. логистика кииннэрин тутууга ыытыллыа, 251 мөл.солк. оройуоннар истэригэр тырааныспар тиһигин тэрийиигэ уонна табаары тарҕатыыга, тиэрдиигэ.
«Ааспыт сылга Абый оройуонугар Белай Гораҕа уонна Усуйаана оройуонун Уус Куйга бөһүөлэгэр эргиэн-логистика кииннэрэ тэриллибиттэрэ. Бу тырааныспар ороскуотун ааҕан-суоттаан, аһы-үөлү тиэйиини улаатыннарарга кыаҕы биэрдэ. 2025 сылга диэри маннык кииннэр Арктика бары оройуоннарыгар былааннаналлар«, — диэн Арктика сайдыытыгар уонна хотугу норуоттар дьыалаларыгар миниистир Владимир Черноградскай «Саха» уонна «Якутия 24» телеханаалларынан ситэриилээх былаас органнарын ааспыт сыллааҕы үлэлэрин отчуотугар эттэ.
Быйылгы сылга бырайыактыыр-чинчийэр үлэлэр саҥа эбийиэктэри тутууга уонна «Якутопторг» эбийиэктэрин эргиэн-логистика кииннэригэр уларытан оҥорууга былааннанан тураллар. Уустук суоллаах-иистээх уонна ыраах баар нэһилиэнньэлээх пууннарга «Якутопторг» боломуочуйалаах оператор быһыытынан былырыын уу суолун уонна дьоҕус авиацияны туһанан ас-үөл тиэрдиитин саҥа схематын үлэлэппитэ.
Аны билигин Баатаҕайга, Орто Халымаҕа уонна Эдьигээҥҥэ эргиэн-логистика кииннэрин тутууга бырайыактыыр үлэлэр саҕаланнылар. Арктика оройуоннарыгар аһы-үөлү тиэрдиини улаатыннарарга, миэстэтигэр уурар, хаһаанар сирдэри тэрийии оруоллаах. Бу ыскылааттар, оҕуруот аһын хаһаанар сирдэр, аһы-үөлү уурар анал камералар. Маны сэргэ улахан суолтаны оройуоннар истэригэр сылы эргиччи тырааныспар сырыытын тэрийии ылар.
Хаартыскаларга Мария Васильева, Андрей Сорокин (СИА) түһэриилэрэ
+1
+1
+1
+1
+1
+1
+1