Уһук Илиҥҥэ 2025 сылга 120 тыһыынча үлэ миэстэтэ баар буолара сабаҕаланар
ХИФУ Медицинскэй институтун профессора, мэдиссиинэ билимин доктора, Арассыыйатааҕы профессордар мунньахтарын Саха сиринээҕи салаатын бэрэссэдээтэлэ Дарима Гармаева каадырдары иитии туһунан санаатын үллэстэр.
— Федеральнай былаастар олохтоох каадырдар эрэгийиэннэртэн баралларын тохтотор сыалтан, эбии бүддьүөт миэстэлэрин киин үөрэх тэрилтэлэригэр биэрбэккэ, олохтоох үрдүк үөрэх кыһаларыгар биэрэр былааннаахтар. Бастатан туран, эдэр аныгылыы көрүүлээх каадырдарга наадыйар территорияларга болҕомтолорун ууруохтара.
Ити саҥалыы тэриллиигэ уһулуччу миэстэни Уһук Илин үрдүкү оскуолата ылыаҕа. Бу эрэгийиэҥҥэ уонунан инвестиционнай бырайыактар үлэҕэ киирэллэрэ уонна киһи хапытаалын сайыннарыы Агенствота иһитиннэрэринэн, 2025 сылга 120 тыһыынча үлэ миэстэтэ баар буолара сабаҕаланар.
ХИФУ-га барыта 20 тыһыынча устудьуон үөрэнэриттэн 6 тыһыынчатын кэриҥэ арктическай бырагырааманан үөрэнэр.
Профессорскай-преподавательскай састаапка улахан дефицит суох. Ол эрээри, идэ таһымын үрдэтиигэ айан суола, араас таһымнаах кэмпириэнсийэлэргэ кыттыы элбэх ороскуоту эрэйэр.
Итиннэ даҕатан, «Уһук Илин профессора» диэн олоххо киирээри турар бырагыраамаҕа киин үөрэх кыһаларын профессорскай-преподавательскай састаап квалификацияны үрдэтэр салаатын киллэрэргэ этии киллэрэбин.