Саха сирин баһылыга Айсен Николаев кулун тутар 1 күнүгэр Суол федеральнай агентствотын салайааччы Роман Новиковы кытары көрүстэ.
edersaas.ru
Мунньахха ону тэҥэ Суол федеральнай агентствотын массыына суолун тутууга управлениетын начаалынньыга Кайрат Турсунбеков уонна национальнай бырайыагы олоххо киллэрии эрэгийиэннээҕи сайдыытын управлениетын начаалынньыга Радик Фаразутдинов кытыннылар. Роман Новиков өрөспүүбүлүкэ сиригэр-уотугар федеральнай суоллары модернизациялааһыҥҥа Суол федеральнай агентствотын былааннарын кэпсээтэ.
2024 сылга диэри Саха сиригэр 390-ча килимиэтир уопсай уһуннаах 38 эбийиэк тутуллуоҕа, саҥардыллыаҕа уонна өрөмүөннэниэҕэ. 2024 сылга Саха сирин хорук тымыра -– «Лена» А-360 суолга барытыгар аспаал-бетон ууруллуоҕа. Билигин тутуу уонна саҥардыы чэрчитинэн федеральнай суол үлэһиттэрэ Р-504 «Халыма» Дьокуускай-Магадан массыына суолугар 662-с килэмиэтиртэн 692 килэмиэтиргэ диэри; А-360 «Лена» Невер-Дьокуускай суолга 752-с килэмиэтиртэн 780-с килэмиэтиргэ диэри уонна Р-504 «Халыма» Дьокуускай-Магадан суолга 1121-с килэмиэтиртэн 1142-с килэмиэтиргэ диэри үлэлииллэр. Ону таһынан, исписэлиистэр А-360 «Лена» Невер-Дьокуускай массыына суолугар Амма өрүһү туоруур муостаны саҥардаллар. Үлэ 2023 сылга түмүктэниэхтээх.
Өрөспүүбүлүкэ Ил Дархана Айсен Николаев ураты болҕомтону өрөспүүбүлүкэ федеральнай суолларынан сылы быһа тохтоло суох айаны хааччыйыахтаах Алдан, Бүлүү уонна Лена нөҥүө муосталары тутуу боппуруостарыгар уурда.
Көрсүһүү кыттыылаахтара эрэгийиэҥҥэ «Куттала суох хаачыстыбалаах суоллар» национальнай бырайыагы олоххо киллэрии боппуруостарын дьүүллэстилэр. Быйыл национальнай бырайыагынан 251 килэмиэтиртэн тахса суолга чөлүгэр түһэрии былааннанар. Итинтэн 222 килэмиэтирин эрэгийиэннээҕи уонна муниципальнай икки ардыларынааҕы суолларга саҥардыахтара. Үлэ 53 эбийиэккэ ыытыллыаҕа. 2022 сылга барыта 2,54 миллиард солкуобайдаах үбүлээһин көрүлүннэ, ол иһигэр федеральнай бүддьүөттэн — 1,94 миллиартан тахса.
Росавтодор баһылыга суол бырайыактарын олоххо киллэрэргэ касса былаанын кытаанахтык толоруу наадатын бэлиэтээтэ.
«Ордук биэдэмэстибэлэр икки ардыларыгар функциональнай хардарыта бииргэ үлэлээһин суолталаах. Ол эбийиэктэри кэмигэр үбүлээһини хааччыйыахтаах», — диэтэ Роман Новиков.
Надежда ЕГОРОВА, «Саха сирэ» хаһыат, edersaas.ru