Бүгүн, балаҕан ыйын 15 күнүгэр, Хаҥалас улууһун Өктөм сэлиэнньэтигэр саҥа холбоһуктаах оскуола уонна уһуйаан саҥа дьиэтин арыйыы өрөгөйдөөх тэрээһинэ буолан ааста.
Бу күҥҥэ диэри Панкратий Шадрин аатынан Өктөм орто оскуолатын мас дьиэтэ хаарбах турукка тиийэн оҕолор түөр араас дьиэлэргэ үөрэнэллэрэ. Айсен Николаев 2018 сыллаахха кэлэ сылдьан балаһыанньа соччото суоҕун уу хараҕынан көрөн “Саҥа оскуола хайаан даҕаны чугас кэмҥэ тутуллуоҕа” диэн тылын биэрэн барбыт.
Ол курдук 2019 сыл муус устарыттан оскуола тутуута саҕаламмыт. Саҥа тутуллубут оскуола арыллыытыгар Ил Дархан кэлэн олохтоохтору, оҕолору эҕэрдэлээтэ, тутууга кыттыбыт үлэһиэттэри, үбүнэн, үлэнэн көмөлөспүт дьоҥҥо махтал тылларын тиэртэ.
— Мааны оҥоһуулаах оскуола мантан ыла Саха сиригэр тутуллар оскуолаларга холобур буолуоҕа – диэн Ил Дархан үрдүк сыанабылы биэрдэ. Оскуола дириэктэрэ Афанасьева Калиста Федосьевна Ил Дархан илиититтэн оскуола автобуһун ылар сэртипикээти тутан үөрүү-көтүү буолла.
Манна даҕатан эттэххэ, оскуоланы туппут сүрүн бэдэрээччит “Сэттэ” ХЭТ салайааччыта Андрей Джурович Данилов Өктөм орто оскуолатын бүтэрбит эбит. Кини харда тылыгар “Оскуола дьиэтин тутуутугар үгүс выпускник кытынна, бары олус кичэллээхтик, суобастаахтык үлэлээтибит”, — диэтэ.
Оскуола дьиэтэ «Үөрэхтээһин» национальнай бырайыак чэрчитинэн өрөспүүбүлүкэ инвестиционнай бырагырааматын үбүгэр тутуллубут. Икки этээстээх дьиэҕэ 220 үөрэнэр миэстэтэ уонна уһуйааҥҥа 100 миэстэ көрүллүбүт.
2018 сылтан Саха сиригэр 26 оскуола уонна 55 уһуйаан тутулунна. Уопсайа, 2021 сыл түмүгүнэн 14 оскуола уонна 14 уһуйаан үлэҕэ киирэрэ былааннанар. 2024 сылга диэри өрөспүүбүлүкэ үрдүнэн 36 оскуола тутуллара былааннанар.