РФ Үөрэҕин миниистирэ Сергей Кравцов 2024 сылга Арассыыйа хас биирдии оскуолата тыйаатырдаах буолуоҕа диэн эттэ. Кини иһитиннэрбитинэн, бүгүҥҥү күҥҥэ дойду үрдүнэн 12 тыһыынча оскуолаҕа тыйаатыр баар. Бу туһунан ТАСС суруйар.
2024 сылга Арассыыйа бары оскуолаларыгар тыйаатыр баар буолуохтааҕын туһунан миниистир Сергей Кравцов Псковскай уобалас Пушкинские Горы бөһүөлэгэр ыытыллыбыт «Школьная классика» испэктээктэринэн бырайыак финалыгар иһитиннэрдэ:
— Бүгүҥҥү күҥҥэ Арассыыйаҕа 12 тыһыынча оскуолатааҕы тыйаатыр баар. Мантан сэттэ тыһыынчата «Школьная классика» бырайыакка кыттар. Хас биирдии тыйаатыр бу бырайыакка кыттарын былаанныыбыт. 2024 сылга хас биирдии оскуолаҕа тыйаатыр баар буолуоҕа.
Кини этэринэн, сыллата оскуола иһинэн тыйаатыр тэрийиэн баҕалаах үөрэнээччи ахсаана элбиир. Онон оҕо талаанын арыйар сыалтан, 2024 сылга диэри Арассыыйа оскуолаларыгар тыйаатырдар тэриллиэхтэрэ.
СИА хаартыската.