Доруобуйа Маны аах Уопсастыба

2023 сылга доруобуйа харыстабылын үс эбийиэгэ дьэндэйиэ

2023 сылга доруобуйа харыстабылын үс эбийиэгэ үлэҕэ киириэҕэ.

«2021-2025 сылларга СӨ доруобуйа харыстабылын бастакы сүһүөх звенотун модернизациялааһын » өрөспүүбүлүкэтээҕи бырагырааманы олоххо киллэрии иитинэн, «СӨ судаарыстыбаннай сакаасчыт сулууспата» ГКУ доруобуйа харыстабылыгар үс эбийиэги тутууга хантараак түһэристэ. Олору олоххо киллэрии 2023 сыл иккис аҥаарыгар былааннанар. Бу туһунан СӨ Тутуу министиэристибэтин пресс-сулууспата иһитиннэрэр.
«СӨ судаарыстыбаннай сакаасчытын сулууспата» ГКУ  доруобуйа харыстабылын үс эбийиэгин толору бэлэм гына тутууга Уһук Илиҥҥэ бастакынан судаарыстыбаннай хантараак түһэрсибит. Судаарыстыбаннай сакаасчыт тутуу хаамыытын бары түһүмэхтэрин хонтуруоллуур — бырайыактааһынтан, тэрили аҕалыыттан тутуллан үлэҕэ киллэриллиэр диэри.

Таатта улууһугар Ытык Күөл сэлиэнньэтигэр бырагырааманан симиэнэҕэ 200 киһи сылдьар үс мэндиэмэннээх поликлиникатын тутуу саҕаланна. «Монтажник» ПК бэдэрээттээх тэрилтэ номнуо дьиэ атахтарын түһэрбит. Аныгы комплекска оҕолор да, улахан да дьоннор сылдьыахтара. 3 940 кв. м иэннээх саҥа тутууга быраастар көрөр хосторун сэргэ,  рентгенография, флюорография хосторо, ЛФК саалата, 12 куойкаҕа күнүскү стационар былааннаналлар.

Маны таһынан, Уус Маайаҕа уонна Чурапчыга балыыһа комплекстарын тутарга бырайыактыыр-сметнай докумуоннары  оҥоруу үлэлэрэ ыытыллаллар. Тутааччылар сыл бүтүөр диэри судаарыстыбаннай эспэртиисэ түмүгэ биллиэҕин баҕараллар уонна тутар-монтажтыыр үлэни саҕалаабытынан барары былаанныыллар.

Техническэй сорудах быһыытынан Уус Маайа бөһүөлэгэр баар стационар сиригэр-уотугар 104 киһи сылдьан көрдөрөрүгэр аналлаах поликлиникалаах 45 куойкалаах балыыһа комплекса баар буолуоҕа. Уопсай иэнэ 5 924 кв. м. Комплекс икки блога силбэһэр сирдээх. Балыыһа күнүскү стационардаах, диагностическай блоктаах, оҕолорго уонна улахан дьоҥҥо приемнай отделениелаах, фтизиатрия, инфекционнай отделениелар, клинико-диагностическай лаборатория, эпэрээссийэ оҥорор блок, реанимационнай, хирургическай отделение, о.д.а. баар буолаллар. Хозблокка  суһал көмө түөрт массыыната турар сирдээх, таҥас сууйтарар сир, о.д.а. былааннаналлар.

Чурапчыга уон күнүскү куойкалаах, симиэнэҕэ 350 киһини көрөр поликлиникалаах ( II уочарат, блок «Б» хозблок) тутуу былааннанар. 3 220 кв. м иэннээх дьиэҕэ улахан дьон уонна оҕо поликлиниката, 24 куойкалаах оҕо стационара, физиоотделение, 30 куойкалаах терапевтическай стационар, күнүскү реабилитационнай отделение, стоматология, терапияҕа күнүскү стационар баар буолаллара этиллэр.

0
0