Бүгүн, тохсунньу 10 күнүгэр, Ил Дархан Айсен Николаев СӨ бырабыыталыстыбатын салалтатын кытта саҥа сылга маҥнайгы мунньаҕын ыытта. Онно бастакы уочаратынан 2022 сылга ылыныллыбыт былааны хара маҥнайгыттан олоххо киллэриигэ сөптөөх үлэ ыытыллан барыахтааҕа этилиннэ. Онон сибээстээн, тохсунньу бүтүөр диэри 2021 сылга ыйыллыбыт сорудахтар туолууларын уонна 2022 сыллааҕы былааны киллэрэллэригэр ыйда.
«Төһө даҕаны коронавирус дьаҥынан ыалдьыы сыыппарата түспүтүн үрдүнэн барытыгар бэлэм буолуохтаахпыт. Саҥа дьыллааҕы уһун сынньалаҥ кэнниттэн ыарыы туруута элбиэн уонна «омикрон» штаммата да кэлиэн сөп», — диэн Айсен Сергеевич этэр.
Тохсунньу 5 күнүгэр тыа хаһаайыстыбатын сайыннарыыга аналлаах бырагыраамаҕа көннөрүүлэр киирбиттэрэ. Онно тус биирдиилээн хаһаайыстыбаны сайыннарыы диэн туспа хайысха быһыытынан киирэн биэрбитэ. Ол аата быйылгыттан тус хаһаайыстыбалаах дьон судаарыстыбаттан анал субсидияны туһанар кыахтаннылар. Ону тэҥэ, «Култуураны сайыннарыы» судаарыстыбаннай бырагыраамаҕа уларытыы киллэрилиннэ. Бу чэрчитинэн, креативнай оскуоланы тэрийиигэ эрэгийиэннэр федеральнай бүддьүөттэн үп ылыахтара.
«РФ бырабыыталыстыбата ааспыт сыл түмүктэниитин саҕана Арктика эрэгийиэннэригэр олорор оҕолор босхо путевканы туһаналларыгар аналлаах дьаһалга илии баттаабыта. Онон быйылгыттан оҕолор Арассыыйа таһымнаах курортарга сынньаныахтара. Казахстан туһунан этэр буоллахха, итиннэ олорор биир дойдулаахтарбытын кытта сибээһи тутуохтаахпыт. Бүгүн Казахстантан Москваҕа 21 биир дойдулаахпыт этэҥҥэ көтөн кэллилэр. Саха сиринээҕи бастайааннай бэрэстэбиитэлэстибэ биир дойдулаахтарбытын кытта сибээһи тутан олорор», — диэн Ил Дархан иһитиннэрэрдэ.