2022 сылга Саха сиригэр оскуола өрөмүөнүгэр 2,53 млрд солкуобай федеральнай бүддьүөттэн көрүллүбүт

25 улуустааҕы муниципальнай тэриллиилэргэ уонна куорат уокуруктарыгар турар 58 үөрэх тэрилтэлэрин капитальнай өрөмүөннэригэр анаан 2,89 млрд солк. субсидия көрүллүбүт. Бу үптэн 2,53 млрд солк. 2022 сылга анаммыт, 2023 сылга – 356,89 млн. солк. Бу туһунан вице-премьер Сергей Местников олохтоох бэйэни салайыы бэрэстэбиитэллэрин кытта мунньахха иһитиннэрдэ.

Сергей Местников этэринэн, Саха сирэ федеральнай бүддьүөттэн үбүлээһин кээмэйинэн 7 бастыҥ эрэгийиэҥҥэ киирсибит. Вице-премьер 2026 сылга диэри бары өрөмүөҥҥэ наадыйар оскуолалар туруктарын сөргүтүү үлэ барыахтааҕын тоһоҕолоон эттэ. Кини муниципальнай тэриллиилэр уонна куораттааҕы уокуруктар баһылыктарын бэйэлэрин эбэһээтэлистибэлэрин олоххо толору киллэрэллэригэр ыҥырда. 2022 сылга ыытыллыбыт үлэ түмүгүнэн кэлэр түөрт сыл устата федеральнай субсидиялары көрүү быһаарыллыаҕа.

Бүгүҥҥү күн туругунан капитальнай өрөмүөҥҥэ өрөспүүбүлүкэ 226 үөрэх тэрилтэтэ наадыйар. Саха сирин министиэристибэтэ федеральнай бүддьүөттэн субсидияны ыларга сайаапкаҕа симиэтэлээх, эспэртиисэ түмүгэ ылыллыбыт 58 үөрэх тэрилтэтин киллэрбитэ.

«Саха сирэ» хаһыат, edersaas.ru

Хаартыска sakha.gov.ru