Маны аах Уопсастыба

2022 сылга Бэрдьигэстээххэ элбэх кыбартыыралаах сэттэ дьиэ тутуллуо

Горнай улууһугар Бэрдьигэстээххэ 2022 сылга 176 ыалга элбэх кыбартыыралаах сэттэ дьиэ тутуллуо.

Саҥа түөлбэ «2019-2025 сс. хаарбах дьиэттэн дьону көһөрүү» бырагырааманан тутуллар.
СӨ Ил Дархана Айсен Николаев тыа сирдэригэр уонна куораттарга сири-уоту кэлимник сайыннарыыга түөлбэнэн тутуу суолтатын бэлиэтээн турар. Бэрдьигэстээххэ түөлбэ биэс тыһ. кв.м. тахса иэннээх сири ылар. Бэдэрээччит «Адгезия» ХЭУо 26-лыы кыбартыыралаах үстүү мэндиэмэннээх сэттэ дьиэни тутар.

«Бүгүҥҥү күҥҥэ сэттэ дьиэ көҥдөйө тутулунна, инженернэй ситимнэр киллэрилиннилэр. Ону таһынан, баһаарынай резервуардары уонна носуос ыстаансыйатын дьиэтин тутуу үлэлэрэ түмүктэннилэр. Эбийиэктэр 30% бэлэмнэр. Тутааччылар чугастааҕы кэмҥэ дьиэ үрдүн, кырыыһатын бүтэриэхтэрэ. Ол кэнниттэн сынньана түһэн баран, үлэлэрин саас салгыахтара. 2022 сыл бүтүүтүгэр эбийиэги үлэҕэ киллэриэхтэрэ«, — диэн СӨ Тутуу министиэристибэтиттэн иһитиннэрэллэр.

Быйыл Горнайга биэс тыһ.кв. м. тахса иэннээх элбэх кыбартыыралаах икки дьиэ тутуллубута. Итиннэ 425 киһи көспүтэ.  Үлэ салҕанар. Ол чэрчитинэн, аны 2025 сыл түмүктэниэр диэри, улуус үрдүнэн 14 385,77 кв. м.  иэннээх хаарбах дьиэттэн дьону-сэргэни көһөрүү үлэтэ ыытыллыа. Билигин онно 1 225  киһи олороро бэлиэтэнэр. Ити сыалга 2025 сылга диэри федеральнай уонна өрөспүүбүлүкэ бүддьүөтүттэн 1650,12 мөл.солк. үп көрүллэр.

Санатан эттэххэ, квартальнай тутууга бөдөҥ инвестиционнай бырайыактар олоххо киллэриллэллэр. Ол курдук, Дьокуускайга «Звезднай» микрооройуон уонна Нерюнгригэ «Р» түөлбэ. Бүгүҥҥү күҥҥэ хаарбах дьиэттэн дьону көһөрүү бырагырааматынан «Звезднайга» сэттэ дьиэҕэ  358 кыбартыыраны атыыласпыттар. Нерюнгригэ «Р» түөлбэҕэ кыбартыыралары эмиэ атыылаһыахтара диэн иһитиннэриигэ этиллэр.

Хаартыскалар СӨ Тутуу министиэристибэтин пресс-сулууспатын тиксэриилэрэ

 

0
0
Telegram @edersaas20