2022 сылга «Азия оҕолоро» сайыҥҥы оонньуулар Владивостокка ыытыллыахтарын сөп
Бу туһунан edersaas.ru саайтка «Азия оҕолоро» оонньууларын Норуоттар икки ардыларынааҕы кэмитиэтин генеральнай дириэктэринэн саҥа анаммыт Гаврил Цыпандин кэпсээтэ.
Ахсынньы 9 күнүгэр «Азия оҕолоро» оонньуулар норуоттар икки ардыларынааҕы кэмитиэтин мунньаҕар Гаврил Цыпандины диэриэктэринэн аныыр дьаһал тахсыбыта. Кини кандидатурата кэмитиэт бэрэсидьиэнэ Владимир Максимов этиитинэн туруоруллубута. Санатан эттэххэ, генеральнай дириэктэр түөрт сылга талыллар. Кини эбээһинэһигэр кэмитиэт толорор уорганын салайыы киирэр.
Гаврил Цыпандин «Азия оҕолоро» бырайыакка тоҕус сыл кэриҥэ үлэлээтэ. 2011 сылга «Азия оҕолоро» дириэксийэтин успуорка үлэтин салаатыгар начаалынньыгынан ылыллыбыта. 2014 сыллаахха Дириэксийэ салайааччытынан анаммыта. 2018 сылтан генеральнай дириэктэр солбуйааччытынан үлэлээн кэллэ.
Санатан этэр буоллахха, бу иннинэ генеральнай диэриэктэринэн Владимир Максимов үлэлии сылдьыбыта. Кинини бу сыл күһүнүгэр Ил Дархан анааһынынан кэмитиэт бэрэсидьиэнинэн оҥорбуттара. Кини кандидатуратын Арассыыйа Олимпийскай кэмитиэтин бэрэсидьиэнэ Станислав Поздняков уонна Азия оонньууларын Олимпийскай сэбиэтин дириэктэрэ Хайдер Фарман өйөөбүттэрэ.
Саҥа анаммыт генеральнай дириэктэр Гаврил Цыпандин олус элбэх үлэ кэтэһэр диэтэ:
—Мин үлэм сүрүн тосхолун «Азия оҕолоро» оонньуулары өрө таһаарыыга, киэҥ араҥаҕа тарҕатарга көрөбүн. Урут оонньуулар Дьокуускайга эрэ буолар буоллахтарына, аҕыйах сылтан бэттэх күрэхтэһиилэри дойду атын куораттарыгар ыытабыт. 2022 сыллааҕы сайыҥҥы оонньуулары Приморье кыраайыгар Владивосток куоракка ыытар былааннаахпыт. Билигин бу туһунан кэпсэтии бара турар.
Оттон 2023 сылга II кыһыҥҥы оонньуулар Кемерово уобалаһын куораттарыгар ыытыллара былааннанар. Сотору кэминэн, сайаапка түһэрсэ, эбийиэктэри көрө барыахтаахпыт.
2024 сылга «Азия оҕолоро» VIII сайыҥҥы спортивнай оонньуулар Дьокуускай куоракка ыытыллыахтара.
—Кыһыҥҥы оонньууларга саха төрүт көрүҥнэрин күрэхтэһиигэ киллэрэр кыах баар дуо?
—Бастатан туран, сахаларга чопчу кыһыҥҥы успуорт көрүҥэ диэн суоҕун кэриэтэ. Иккиһинэн, Азия дойдуларыгар үксүлэригэр хаар сэдэх көстүү. Онон, онуоха-маныаха диэри олимпийскай да көрүҥнэр сөп оҥороллор. Баҕар кэнники, оонньуу кээмэйэ өссө кэҥээтэҕинэ толкуйдуохпут.
— Өрөспүүбүлүкэбит бириэндэ буолбут “Азия оҕолоро” оонньуулар атын сиргэ ыытыллар буолбуттарыгар дьоҥҥо араас санаа үөскээбитэ. Ол эрээри, үгүстэр «атын куоракка ыытыллар күрэхтэһиигэ өрөспүүбүлүкэ харчытын бараан эрэллэр» диэн айдаараллар этэ. Кырдьык оннук дуо? Күрэхтэһиини дойду атын куораттарыгар ыытарга өрөспүүбүлүкэ харчыта баранар дуо?
—Суох. Оонньуулар атын куораттарга ыытыллалларыгар өрөспүүбүлүкэ бүддьүөтүттэн биир да солкуобай бараммат. Оонньууну ыытар эрэгийиэн ороскуоту бэйэтэ уйунар, ону таһынан, РФ успуордун министиэристибэтэ көмөлөһөр уонна оонньуу кэмитиэтэ көмө тэрилтэлэртэн, дьонтон (спонсордар) ылбыт харчыта туһаныллар.
—Гаврил Гаврильевич, үлэҕэр ситиһиилэри!
Виктория Бястинова, edersaas.ru