Ил Дархан Айсен Николаев бүгүҥҥү Анал этиитигэр 2022 сылы өрөспүүбүлүкэҕэ Ийэ сылынан биллэрдэ. Эһиил төрөөбүт хас биирдии оҕоҕо 100 тыһыынча солкуобайдаах анал хапытаал арыллыаҕын туһунан эттэ.
– Ийэ сылыгар кыргыттар, ийэлэр идэлээх, дьарыктаах буолууларыгар болҕомто ууруллуоҕа. Дьарыктаах буолуу кииннэригэр, бастатан туран, кинилэр боппуруостара быһаарыллыаҕа, ханна олороллоруттан, саастарыттан, социальнай балаһыанньаларыттан тутулуга суох. Ону сэргэ кэрэ аҥаардар чөл туруктаах буолууларыгар анал бырагыраама үлэлиэҕэ, – диэн иһитиннэрдэ Ил Дархан.
Ийэ сылыгар биэс эбэтэр онтон элбэх оҕолоох ыаллар дьиэ ылыыларыгар көмө барыаҕа. Билигин өрөспүүбүлүкэ үрдүнэн 1815 ыал дьиэ ылыытыгар уочаракка турар. Быйыл кинилэртэн 56 ыал көмөнү ылла. “Маннык тиэмпэнэн бардахпытына дьиэ кэргэн отучча сыл дьиэтин кэтэһиэн наада. Онон кэлэр биэс сылга бу боппуруоһу быһаарарга бырабыыталыстыбаҕа сорудах биэрэбин. Ону таһынан муниципальнай тэриллиилэргэ биэстэн элбэх оҕолоох ыалларга көмөлөһөллөрүгэр, кинилэри дьиэ-уот нолуогуттан босхолуулларыгар этии киллэрэбин”, – диэн бэлиэтээн эттэ Айсен Сергеевич.
Ил Дархан тулаайах уонна төрөппүт көрүүтэ-истиитэ суох хаалбыт оҕолорго, кинилэри иитэ ылар ыалларга болҕомтону уурарга эттэ. “Өрөспүүбүлүкэ үрдүнэн билигин 634 оҕо 233 ыалга иитиллэр. Кинилэргэ көмө быһыытынан үбүлээһини икки төгүл улаатыннарыахха. Дьокуускайга Дьиэ кэргэҥҥэ, оҕолорго социальнай көмө киинин тутуутун эһиилгиттэн саҕалаан былаанныахха. Ону таһынан дьиэ кэргэҥҥэ, ийэҕэ туһуламмыт бырайыактаах уопсастыбаннай түмсүүлэргэ бэриллэр граны икки төгүл элбэтиэххэ”, – диэн иһитиннэрдэ.
Түмүккэ Ил Дархан эһиил үбүлүөйдээх сылга төрөөбүт оҕолорго “Дети столетия” диэн тус сыаллаах 100 тыһыынча солкуобайдаах хапытаалы тэрийэргэ эттэ.
Аграфена КУЗЬМИНА