Маны аах Тырааныспар

2022-2023 сылларга аэропортарга тутуу үлэлэрин ситэрэн-хоторон бүтэрэр былаан баар

Саха сиригэр аэропортарга тутуу үлэлэрин 2022-2023 сылларга бүтэрэр, түмүктүүр былааннаахтар.

Нерюнгрига аэропорт от ыйын 1 күнүттэн сэтинньи 1 күнүгэр диэри сабылынна. Оттон Дьокуускайга сөмөлүөт көтөр-түһэр балаһатын саҥардан оҥоруу үлэтин толору алтынньыттан саҕалыахтара. Бу уонна атын аэропортарга ыытыллар үлэлэр  тустарынан социальнай ситимнэринэн быһа биэриигэ СӨ Ил Дархана Айсен Николаев иһитиннэрбитин СИА тиэртэ.
Өрөспүүбүлүкэҕэ аэропортарга, ол иһигэр бөдөҥ аэропортарга, үлэ көхтөөхтүк салҕанарын туһунан эрэгийиэн баһылыга бэлиэтээтэ. Дьокуускайга сөмөлүөт көтөр-түһэр балаһатын өрөмүөннээһин үлэтэ хаһыс да сылын ыытыллар. Нерюнгригэ балаһалара бүтүннүү уларытыллар уонна аэровокзал комплекса тутуллар. Мииринэйгэ эмиэ итинник саҥа комплекстаныахтаахтар уонна саҥа балаһаланыахтаахтар.
Ил Дархан Нерюнгригэ сөмөлүөт көтөр-түһэр балаһатын саҥардыыга оройуон салалтатын, былаас федеральнай органнарын, нэһилиэнньэни кытары сөптөөх уһун дьүүллэһии ыытыллыбытын эттэ. Ол түмүгүнэн, аэропорду от ыйын 1 күнүттэн сэтинньи 1 күнүгэр диэри сабан баран үлэни ыытар туһунан быһаарыы ылыллыбыт. Ити кэмҥэ 3 600 м. балаһа оҥоһуллан, салгын ааллара түһэр кыахтаныахтаахтар.
«Алтынньы саҥатыттан сэтинньи саҥатыгар диэри сертификация кэнниттэн, балаһа урукку эрэсииминэн үлэтин салҕаан барарыгар эрэнэбит. Барытын бүтэрэр-оһорор наада. Бу кыһын Дьокуускайга туманнаах буолан балачча элбэх кыһалҕаны көрсүбүппүт уонна Чульмаҥҥа балаһа хаачыстыбата мөлтөҕүттэн, хаста да сөмөлүөт түһүүтүгэр уустуктар үөскүү сылдьыбыттара. Билигин кыһалҕа быһаарыллыа. Балаһаны тутуу үлэтэ хааччахтааһына суох салҕанар. 2022-23 сылларга бары аэропортарга үлэлэр этэҥҥэ түмүктэнэллэригэр эрэнэбит«, — диэтэ Айсен Николаев.
 СӨ Ил Дархана дойду вице-премьерэ Марат Хуснуллин РФ Тырааныспарка миниистирэ Виталий Савельевы кытта соторутааҕыта Нерюнгри аэропордугар сылдьыбыттарын эттэ.
«Өрөспүүбүлүкэ бэдэрээччиттэрин тардыы, үлэни тэрийии туһунан үчүгэй өйдөбүллээхтэр. Үлэ болдьоммут кыраапыктарга толорулларыгар эрэнэбит«, — диэтэ эрэгийиэн баһылыга.
Дьокуускай пордугар балаһаны өрөмүөннээһиҥҥэ, өрөспүүбүлүкэ баһылыга бастакы сылларга үлэ сөбө суохтук ыытыллыбытын, бырайыактыыр-сметнай докумуоҥҥа сыыһалардааҕын бэлиэтээтэ. Ол түмүгэр, СӨ Бырабыыталыстыбатын  көрдөһүүтүнэн, 2018-2019 сылларга саҥаттан бырайыактааһын үлэтэ ыытыллыбыт, ону таһынан, Дьокуускай порда барыта сабыллан хаалбатын курдук халыып талыллыбыт.
«Элбэх киһи Дьокуускай аэропордун ханнык эрэ кэмҥэ сабыахха сөп диэн быһаарыылара уларытылынна. Балаһа төһө да кылгаһын иһин, үлэлии туруохтаах диэн быһаарыы ылылынна. Билигин бу балаһанан Боинг 737-700 сөмөлүөт көтөр«, — диэн эбэн эттэ.
Быйыл тутааччылар эргэ балаһаны уонна саҥа учаастагы ситимниир 625 м. саҥа балаһа уонна пандус оҥоруохтаахтар, Бу барыта балаҕан ыйын 1 күнүгэр диэри бүтүөхтээх. Өрөспүүбүлүкэ Ил Дархана алтынньыттан, эбэтэр сэтинньиттэн,  сертификация кэнниттэн, Дьокуускай аэропордугар сөмөлүөт көтөр-түһэр балаһата 3 400 м. толору үлэлииригэр уонна ханнык баҕарар көтөр аалы көрсөр кыахтанарыгар эрэнэрин биллэрдэ.
2023 сыл сааһыгар диэри итинник буолуоҕа, ол эбэтэр 2021 сылтан хаалбыт, 2022 бүтүннүүтэ уонна 2023 сыл саҥатыгар Дьокуускайга көтөр-түһэр балаһа устатынан толору туһаныллар, үлэлиир кыахтаныа. 2023 сылтан түмүктүүр үлэ саҕаланыа. Ыам ыйыттан балаҕан ыйыгар диэри кэмҥэ балаһа хаалбыта барыта толору уларытыллыа.
«Ити кэмҥэ биһиги эмиэ кылгас, 1 650 — 1 800 м. балаһаланыахпыт, бу 3-4 ый устатыгар. 2023 сыл күһүнүгэр диэри биһиэхэ балаһа барыта саҥардылларыгар эрэнэбин«, — диир Николаев.
Кини маны сэргэ, Мииринэйгэ саҥа аэропорт тутуллуутун, көтөр аал балаһата оҥоһуллуутун сырдатта.
«Чугастааҕы үс сылга үлэ түмүктэнэригэр эрэнэбин. Маны таһынан оройуоннар кииннэригэр элбэх 
аэропортарга үлэ бара турар. Олору көрөбүт, хонтуруоллуубут. Хомойуох иһин, сорох сирдэргэ кыраапыктан хаалыы бэлиэтэнэр, сорохторго этэҥҥэ салҕанар. Барыта этэҥҥэ буоларыгар эрэл баар», — диэтэ кини.
0
0