2020 сылга дохуот ылбыт дьон бу сыл муус устар 30 күнүгэр диэри 3-НДФЛ диэн формалаах нолуок декларациятын түһэриэхтээхтэр. Өскөтүн 2020 сылга 3 сыл иһинэн киһи бас билэр дьиэтин-уотун, кыбартыыратын, гарааһын, сирин атыылаабыт, сыаналаах бэлэҕи ылбыт, лотереяҕа сүүйбүт, дьиэни-уоту арыандаҕа биэрбит эбэтэр тас дойдуттан дохуоттаммыт буоллаҕына, 3-НДФЛ формалаах декларацияны туттарыахтаах.
Декларацияны олорор сиргэ баар нолуок органыгар туттарыахха, эбэтэр Нолуок федеральнай сулууспатын саайтыгар «Личный кабинет налогоплательщика — физического лица» https://lkfl2.nalog.ru/lkfl/login/ диэн анал сыһыарыы нөҥүө олус судургутук онлайн толорон, нолуок инспекциятыгар ыытыахха, ону таһынан, камеральнай бэрэбиэркэ хаамыытын кэтээн көрүөххэ сөп.
“Судаарыстыбаннай өҥө” порталга регистрациялаах туһанааччылар «Личный кабинет налогоплательщика для физических лиц» диэн анал сыһыарыыга бэйэлэрин бигэргэтиллибит ааттарынан киирэллэр. Тус кэбиниэккэ киирэр логин уонна пароль суох эбит буоллаҕына, МФЦ офистарыттан уонна чугас баар нолуок органыгар тиийэн ылыахха сөп.
Ону таһынан, Андроид уонна IOS бырагыраамалаах төлөпүөн туһанааччыларыгар анаан, “Налоги ФЛ” диэн анал сыһыарыыны App Store уонна Google Play маркетыттан босхо хачайдыахха сөп.
Нолуок федеральнай сулууспатын электроннай өҥөлөрүнэн туһаныҥ — олус табыгастаах уонна тоҕоостоох!
СӨ Нолуок федеральнай сулууспатын управлениетын пресс-сулууспата.