2021 сылга өрөспүүбүлүкэҕэ успуорт алта эбийиэгэ тутуллубут.
Саха сиригэр 2021 сылга успуорт 6 эбийиэгэ тутуллубут. Бу туһунан СӨ Бырабыыталыстыбатын ааспыт сыллааҕы үлэтин отчуотугар этилиннэ диэн СӨ Ил Дархан уонна Бырабыыталыстыба пресс-сулууспата иһитиннэрэр. Ол курдук, Горнай улууһугар Бэрдьигэстээххэ сүүрэр дорожкалаах, 1000 миэстэлээх трибуналаах стадион, Үөһээ Бүлүүгэ Харыйалаахха успуорт саалата, Сунтаар улууһугар Хордоҕойго чэбдигирдэр спортивнай комплекс, Алдаҥҥа бассейнаах уларытыллан тутуллубут «Энергетик» спортивнай-чэбдигирдэр комплекс, Покровскайга тустуу саалата уонна Үөһээ Халыма оройуонугар Зырянкаҕа култуура-успуорт комплекса үлэҕэ киирбитэ.
«Успуорт — олох ирдэбилэ» федеральнай бырайыак иитинэн, 2021 сыллаахха 59,87 мөл. солк. суумалаах успуорт тэрилэ атыылаһыллыбыта: Алдан куоракка хайыһарга Олимпийскай эрэллэри бэлэмниир өрөспүүбүлүкэтээҕи успуорт оскуолатыгар хайыһар мала-сала, буоксаҕа Олимпийскай эрэллэри бэлэмниир успуорт оскуолатыгар наадалаах малы-салы, «Эллэй Боотур» муустаах дыбарыаска хоккейга тутталларыгар аналлаах тэриллэри, Р.М.Дмитриев аатынан Олимпийскай эрэллэри бэлэмниир өрөспүүбүлүкэтээҕи училищеҕа физкултуурунай-чэбдигирдэр комплекс аһаҕас көрүҥнээх спортивнай-технологическай тэрил кэмпилиэгэ, Абый, Анаабыр, Үөһээ Халыма, Өлөөн оройуоннарыгар уонна Дьокуускайга ГТО дьоҕус спортивнай былаһааккаларыгар аналлаах тэриллэр ылыллыбыттара.
Өрөспүүбүлүкэ 64 спортивнай тэрилтэлэригэр 35,5 тыһ. оҕо дьарыктанара бэлиэтэнэр. Эбэтэр оскуола үөрэнээччилэриттэн 24 %. Итинтэн 3,5 тыһ. оҕо былырыын сайын Нам, Алдан, Ньурба, Чурапчы уонна да атын, барыта 11 успуорт оскуола баазатыгар дьарыктаммыттара, сүүмэрдэммиттэрэ.
2021 сылга «Үлэҕэ уонна оборуонаҕа бэлэммин» бэлиэни 4625 киһи ылбыта, ГТО кыһыл көмүс бэлиэтин – 1 964 киһи, үрүҥ көмүһү – 1573, боруонсаны – 1088.
Нэһилиэнньэ чөл, чэгиэн олохтоох буоларыгар, физкултууранан уонна успуордунан тиһиктээхтик дьарыктанарыгар табыгастаах усулуобуйаны тэрийии, өрөспүүбүлүкэ биир улахан суолталаах сыалын ситиһии буолар. 2021 сыл ол иннинээ5и сылы кытары тэҥнээтэххэ, физическэй култууранан уонна спордунан дьарыктанар нэһилиэнньэ ирээтэ 43,5-тэн 46%-ҥа диэри эбиллибит.
Хаартыскалар: СИА
+1
+1
+1
+1
+1
+1
+1