Саха сиригэр ыытыллыбыт «Экстрасенстар киирсиилэрэ» күрэс кыайыылааҕа, «Сырдык күүс» киинэ дьоруойа, айылҕаттан айдарыылаах, ураты көрүүлээх Мария Кононова (Иванова) 2021 сылга туох буолуохтааҕын, биһигини туох кэтэһэрин өтө көрөн, кэпсээтэ.
Кини этэринэн, үүммүт 2021 сыл ааспыт сылы “батыһар”, орто баайыылаах эрээри, уустуктардаах буолсу. Өтө көрүү киниэхэ араас көстүү, иһитиннэрии көрүҥүнэн кэлэр эбит. “Сороҕор кыратык сыыһа этитии баар буолуон сөп, ол эрээри 60% туоларыгар эрэнэбин”, — диэн кини этэр.
— Быйыл 2021 сылга буолбут көстүүлэр салҕаналлар. Пандемия тохтообот, саҥа кэмҥэ көһүү уларыйыылара өссө күүһүрэллэр.
— Коронавирустан вакциналары маассабайдык биэриэхтэрэ, ол гынан баран, олор туһалара кыра буолуо. Сайын биир омук вакцината кэлиэҕэ, ол вируска арыый тулуктаһыаҕа.
— Олох бары араҥаларыгар, бары систиэмэлэргэ цифровизация күүскэ сайдыаҕа, онон ол өр сылларга биһиги олохпутугар өтөн киирдэ.
— Интэриниэтинэн дьону албыннааһын, харчыны уоруу өссө элбиэҕэ. Билигин үлэлии турар технологиялар кыһалҕаны быһаарбаттарын, ситэтэ суохтарын дьон өйдүөҕэ. Квантовай көмпүүтэри айан, дааннайдары харайыы саҥа көрүҥүн киллэриэхтэрэ.
— Арассыыйаҕа уонна биһиги өрөспүүбүлүкэбитигэр бэлиитикэҕэ уларыйыылары, оппозиционнай баартыйалар, мунньахтар элбииллэрин көрөбүн. Сорох бэлиитиктэр олохторугар улахан уларыйыылар буолуохтара. Биллэр биричиинэнэн, ааттарын эппэппин.
— Аан дойдуга “тымныы сэрии” саҕаланыаҕа, үп-харчы өттүгэр элбэх кыһалҕалар үөскүөхтэрэ.
— Кыаммат, тиийиммэт уонна кырдьаҕас дьоҥҥо анаан саҥа сокуоннар ылыллыахтара, ол эрээри, дохуоттара онтон биллэрдик үрдүө суоҕа.
— Харчы тиийбэт буолан, дьону албыннаан, үктэтэн ылааччылар элбиэхтэрэ. Түөкүттэр саҥаттан саҥа схемалары айыахтара.
— Коронавируһунан ыалдьыы аҕыйыаҕа, ол эрээри өлүү ахсаана элбиэҕэ. Вирус уларыйан, “хаачыстыбаҕа” үлэлиир буоулоҕа.
— Саҥа планеталары арыйыахтара, наукаҕа элбэх арыйыылары, космоска көтөр хараабыллары көрөбүн.
— Айылҕаҕа уларыйыылар буолуохтара. Кыһыл халлааны, атын дойдуларга улахан баһаардары көрөбүн. Салгын састааба уларыйыаҕа, ол тымыр-сүрэх ыарыылаахтарга кутталлаах.
— Билигин эмтэммэт ыарыыны кыайар эми айбыт гений баарын көрөбүн. Ол эрээри, кини уһулуччу арыйыытын научнай эйгэҕэ билиниэхтэрин баҕарыахтара суоҕа.
— Айдаан, “хайп” элбэх буолуо. Буруйу оҥоруу намтыа суоҕа. Уопсайынан, бу үүммүт сыл орто баайыылаах, уустук соҕус буолуо. Хас биирдии киһини кыайыылар да, кыайтарыылар да күүтэллэр…
Мария Кононова (Иванова) туһунан “Айылҕаттан айдарыылаах кыыс” диэн ааттаах суруйууну edersaas.ru саайтан булан, эбэтэр бу сигэни баттаан ааҕыаххытын сөп.
Ангелина Васильева, “Саха сирэ” хаһыат, edersaas.ru
Хаартыска: Инстаграмтан.