2021 сылга Саха сирин култууратын тэрээһиннэригэр сылдьыы 16 мөлүйүөҥҥэ тиийбит

Былырыын Саха сирин тыйаатырдарыгар, киинэ тыйаатырдарыгар, быыстапкаларга уонна да атын тэрээһиннэргэ сылдьыы 16 мөлүйүөҥҥэ тиийбит. Ити туһунан кулун тутар 25 күнүгэр Арассыыйа култууратын үлэһитин күнүгэр аналлаах үөрүүлээх тэрээһиҥҥэ СӨ бырабыыталыстыбатын бэрэссэдээтэлин солбуйааччы Сергей Местников иһитиннэрдэ.

“Төһө даҕаны уустуктар баалларын иһин, былырыын өрөспүүбүлүкэҕэ култуура тэрээһинигэр сылдьыы муҥутуур чыпчаалга тиийдэ – 16 мөлүйүөн. Бу култуура үлэһиттэрэ сылайары аахсыбакка айымньылаах үлэлэрин, талааннарын уонна идэлэригэр бэриниилэрин эрэгийиэн олохтоохторо биһирииллэрин чаҕылхай холобура”, — диэн Сергей Местников бэлиэтээтэ.

Култуура эйгэтигэр ситиһиилэр туһунан ахтарыгар,  былырыын өрөспүүбүлүкэ «Кинигэ уонна ааҕыы территорията» диэн эрдэ “Саамай ааҕар эрэгийиэн” диэн Бүтүн Арассыыйатааҕы куонкуруска бастаабыт эрэгийиэннэргэ туттарыллар бочуоттаах ааты ылбытын санатта. Саха сирин киинэтин режиссердарын үлэлэрэ норуоттар икки ардыларынааҕы уонна дойду бэстибээллэригэр наҕараадаланаллар. “Онегин” диэн улахан опернай национальнай бириэмийэни СӨ Опера уонна балет судаарыстыбаннай тыйаатыра ылбыта. Саха сиринээҕи балет оскуолатын устудьуоннарын Алисия Пак уона Иван Одинцов ситиһиилэринэн киэн туттабыт.

Вице-премьер өрөспүүбүлүкэ салалтатын аатыттан Арассыыйаҕы култуура үлэһитин күнүнэн эрэгийиэн бары култууратын үлэһиттэрин эҕэрдэлээтэ. Өрөспүүбүлүкэ салалтата салгыы даҕаны култуура аныгы инфраструктуратын сайыннарыыга улахан болҕомтотун ууруоҕа диэн бэлиэтээтэ.

“Биһиги кинематографистарбытынан, тыйаатыр диэйэтэллэринэн, бибилэтиэкэрдэринэн, кэнсиэр уонна кулууп тэрилтэлэрин, түмэллэр, биһиги уопсастыбабыт култууратын-духуобунаһын уонна интеллектуальнай элитэтин бары үлэһиттэрин ситиһиилэринэн киэн туттабыт. Дойду бэрэсидьиэнэ Владимир Путин биллэрбит Арассыыйа норуоттарын култуураларын нэһилиэстибэтин сылынан уонна өрөспүүбүлүкэ 100 сылынан эһиэхэ улахан эппиэтинэс сүктэриллэр – Саха сирин үрдүнэн киэҥник ыытыллар култуура тэрээһиннэрин умнуллубаттык тэрийии”, — диэн вице-премьер эттэ.

Түмүккэ бырабыыталыстыба бэрэссэдээтэлэ култуура үлэһиттэригэр Саха Өрөспүүбүлүкэтин судаарыстыбаннай наҕараадаларын туттарда.

СӨ Ил Дарханын уонна СӨ Бырабыыталыстыбатын пресс-сулууспата.

 Хаартыска: СӨ Култууратын уонна духуобунай сайдыытын министиэристибэтиттэн.