Дьокуускай куоракка Ленин проспегын хапытаалынай өрөмүөнэ саҕаланыаҕа. Ол курдук ЛОРП дьиэтиттэн саҕалаан Курашов уулуссатыгар диэри өрөмүөннүөхтэрэ. Бу туһунан СИА-ҕа куорат мэрин эбээһинэһин толорооччу Евгений Григорьев иһитиннэрбит.
«Быйылгыттан инженернэй ситимнэри оҥорон саҕалыахпыт. Матырыйаалы тиэйэн аҕалыахпыт. Онон өрөспүүбүлүкэ 100 сылыгар, 2022 сылга, бу түһүмэҕи бүтэрэр курдук былааннаахпыт», — диэн Евгений Григорьев кэпсээтэ.
Массыына суола түөрт балаһатынан хаалыаҕа, кэтитэ эмиэ уларыйыа суоҕа. Кытыыларынан уу сүүрэр лотоктары оҥоруохтара. Тротуар билиитэлэрин гранитка уларытыахтара. Суол икки кытыытынан бэлэсипиэттээх дьон сылдьарыгар анаан кыра суоллары оҥоруохтара. Маны таһынан уот опораларын уларытыахтара, оптуобус тохтобулларын биир истиилинэн оҥоруохтара.
Ленин проспегын кыйа турар дьиэлэр тас эркиннэрин саҥардыахтара.
Бырайыак уопсай суумата быһа холоон 1,5 млрд солкуобай. Үлэ «Куттала суох уонна хаачыстыбалаах массыына суоллара» национальнай бырайыак иитинэн ыытыллар.
СИА