2021 сылга диэри үс коррекционнай оскуола тэҥинэн тутуллуоҕа
Ил Дархан Айсен Николаев быһа сибээскэ тахсар кэмигэр коррекционнай (речевой) оскуола тутуута 2012 сылтан сыллата көһөн иһэр диэн ыйытыы киирдэ.
edersaas.ru
Санатан эттэххэ, тустаах оскуола 1964 сыллаахха тэриллибитэ. Күн бүгүн Дьокуускай куоракка биир даҕаны уопсай үөрэхтээһин мас оскуолата суох, бары таас дьиэҕэ көстүлэр. Быһа сибээс кэмигэр, Ил Дархан үс коррекционнай эрэ оскуола хаалан турарын иһитиннэрдэ. Бу Саҥаларыгар улахан кэһиллиилээх өрөспүүбүлүкэтээҕи анал (коррекционнай) интэринээт-оскуола итиэннэ 4-с уонна 34-с коррекционнай оскуолалар буолалларын эттэ.
Бу тиэмэҕэ үгүс кэпсэтии, хайдах гынан түргэнник тутуохха сөбүн туһунан ырытыһыы барбытын ыйда. Саҥаларыгар улахан кэһиллиилээх өрөспүүбүлүкэтээҕи анал (коррекционнай) интэринээт-оскуола бырайыактыыр симиэтэтэ баар эбит эрээри, билигин үөрэнэ олорор оҕотооҕор аҕыйах миэстэҕэ суоттаммыт үһү. Оттон быраастар мөлтөхтүк саҥарар оҕо ахсаана сыллата эбиллэн иһэрин быһаараллар.
“Үөрэх тэрилтэлэрин салгыы тутуу боппуруоһунан Дьокуускай куорат мээрин Сардана Владимировнаны кытта бүтэһигин кэпсэтэрбитигэр, 4-с уонна 34-с коррекционнай оскуолалары өрөспүүбүлүкэ бас билиитигэр ыларга быһаарбыппыт. Онон бу үс оскуоланы тэҥинэн тутан, судаарыстыбаннай-чааһынай бииргэ үлэлэһиинэн 2021 сыл бүтүүтүгэр диэри үлэҕэ киллэрэргэ эрэллээхпит”, — диэн Ил Дархан чопчу хоруйу биэрдэ.
Людмила ПОПОВА, “Саха сирэ” хаһыат, edersaas.ru
Хаартыска — интэриниэттэн.