СӨ Инновацияҕа уонна цифровой сайдыыга министиэристибэтин пресс-сулууспата иһитиннэрэринэн, кэлэр сылга биэс улууска саҥа IT-киин тэриллиэҕэ.
“Цифровой экэниэмикэ” национальнай бырайыак чэрчитинэн биэс улууска саҥа киин тутуллуоҕа. Ханнык улууска IT-киин турарын быһаарар күрэс 2021 сыл сааһыгар саҕаланыаҕа,” —— диэн министиэристибэ биллэрэр.
IT- кииннэр Саха сирин улуустарыгар цифровой сайдыы, аныгы информационнай технологияларга, үөрэх бырагыраамаларыгар быыстала суох киирэр кыаҕы биэриэхтэрэ. Өрөспүүбүлүкэ улуустарыгар маннык кииннэри үлэҕэ киллэрии дьону саҥа цифровой үөрүйэхтэргэ уонна компетенцияларга үөрэтэргэ эрэ буолбакка, саҥа IT-хампаанньалар үөскүүллэригэр көҕүлүүр күүс буолуон сөп.
Холобур Нам улууһун IT-киинэ 2019 сылга аһыллыбыта. Бу кэм иһигэр киин көмөтүнэн үгүс бырайыактар олоххо киирдилэр. Ол иһигэр учууталлар квалификацияларын үрдэтии, саастаах дьону көмпүүтэргэ үөрэтии үлэлэрэ ыытылыннылар.
— Билигин биһиги тулаайах, төрөппүт көрүүтэ-истиитэ суох хаалбыт оҕолору, ыарахаҥҥа түбэспит оҕолору кытта үлэлиир былааннаахпыт. Ол туһугар бэйэбит «ГраФИТ» диэн ааттаах бырайыагы оҥордубут. IT-салаа уонна креативнай эйгэ дисциплиналарыгар үөрэтэргэ, саҥа үөрэҕи ылалларын уонна кинилэр салгыы үлэлииллэрин хааччыйарга аналлаах үлэлэри былаанныыбыт. Ону таһынан Нам улууһугар «СмарЮнит» ХЭО-ны кытта, Саха сиригэр аан бастаан «Умное село» бырайыагы олоххо киллэрэр былааннаахпыт. Бырайыак модулларын билигин нэһилиэнньэ кыһалҕаларын уонна дьон ирдиир өҥөлөрүн учуоттаан таҥа сылдьабыт. Билигин ыйытыктар көмөлөрүнэн маны быһаара сылдьабыт, — диэн өрөспүүбүлүкэ баһылыга Айсен Николаев этэр.
Ил Дархан “Эрэгийиэн инновационнай уонна цифровой сайдыытын туһунан” ыйааҕынан, 2024 сылга 17 IT-киин арыллара былааннанар. Билигин өрөспүүбүлүкэҕэ аҕыс IT-киин үлэлии турар.
«Саха сирэ» хаһыат, edersaas.ru