«Кангалаас» урутаан сайдар сир инникитин кэҥиэн сөп. Өлүөнэ өрүс нөҥүө муоста тутулуннаҕына, логистическай (таһаҕаһы тиэйэр, харайар, тиэрдэр) бырайыактар киириэхтэрэ. Ол туһунан Майя Данилова, СӨ экэниэмикэтин миниистирэ биэдэмистибэ отчуотун кэмигэр тохсунньу 31 күнүгэр иһитиннэрдэ.
edersaas.ru
«Кангалаас» урутаан сайдар сиргэ Жатайдааҕы суудуналары тутар уонна өрөмүөннүүр собуоту киллэрэр туһунан сайаапка Арассыыйа илин өттүн сайыннарар министиэристибэҕэ киирбитэ.
Аллараа Бэстээххэ тимир суолунан кэлэр контейнердары уонна таһаҕаһы харайар улахан терминал, тиэхиньикэни сүөкүүр, ыарахан ыйааһыны уйар кыамталаах платформа 2021 сылга тутуллан бүтүөҕэ. Ону таһынан, өрүһү туоруур муоста тутулуннаҕына, өрөспүүбүлүкэ саамай улахан транспортнай-логистическай киинэ бу бөһүөлэккэ кэлэн түмүллүө.
Онон логистическай бырайыактар бу хайысханан инникитин сайдар кэскиллээхтэр.
Марианна Тыртыкова, «Саха сирэ», edersaas.ru