Ньурба улууһун Чуукаардааҕы Е.М.Поликарпов аатынан “Эйгэ” норуот айымньытын уонна спорт киинэ билигин айа-тута сылдьар дьиэтэ тутуллан киирбитэ быйыл 35-с сыла.
Быйыл Чуукаарга култуура сайдыытын 90 үбүлүөйдээх сыла. Бу туһунан Чуукаардааҕы култуура киинин уус-уран салайааччыта Сэргэн Лэкээрин бу курдук кэпсиир: «Бу үбүлүөйдэри тэҥэ норуот айымньытын киинигэр аата иҥэриллибит, киэн туттар, сүгүрүйэр ытык киһибит, биир дойдулаахпыт, мелодист Егор Поликарпов 80-н сааһын туолар. Бу үөрүүлээх, долгутуулаах, үбүлүөйдээх тэрээһиннэри көрсө култуура үлэһиттэрэ ааспыт сылтан бэрт сэргэх тэрээһиннэри ыыттыбыт. Нэһилиэк уопсастыбанньыктарын, ону тэҥэ куйаар ситиминэн араас улуустартан култуура үлэһиттэрин хабан, ыкса ситимнээхтик үлэлээтибит.
Үүммүт саргылаах 2021 сылы онлайн-пуорманан көрүстүбүт. Дьоммут-сэргэбит куйаар ситиминэн кэнсиэрдэри көрүүгэ үөрэнэн, дьиэлэриттэн тахсыбакка бары тэрээһиннэрбитин астына-дуоһуйа көрөллөр. Ол курдук, саҥа үүммүт сылга сонун сүүрээнинэн “Дойдум дьоно дууһабар аанньал курдук ыалдьыттар” диэн төрөөбүт дойдуларыттан кынат үүннэрэн, үлэһит, кийиит-күтүөт буолан көппүт биир дойдулаахтарбыт кэнсиэрдэрэ улахан болҕомтону тарта. Дойдубут дьоно ыллаан-туойан, дойдуларыгар ахтылҕаннарын таһаардылар, сонуннарын үллэһиннилэр. Чуукаартан кынаттаммыт биир дойдулаахтарбыт ситиһиилээхтик үлэлии сылдьалларыттан биһиги бары киэн тутуннубут. Түгэнинэн туһанан, биһиги көрөөччүлэрбитигэр, күүс-көмө буолар түмсүүлэрбитигэр, тэрилтэлэргэ барҕа махтал тылларын этэбит. Саҥа сылга өссө саҥаттан саҥаны айан-тутан иһиэххэ, иллээх дьиэ-кэргэн оҕолорун курдук биир сомоҕо буолуохха диэн ыҥырабыт.
Ньурба Чуукаарыттан өрөспүүбүлүкэҕэ биллэр дьон: суруналыыс, суруйааччы Прокопий Чуукаар, учуонайдар Алексей Федоров, Михаил Федоров, Варвара Обоюкова, тустуук Петр Алексеев, мелодист
Егор Поликарпов, оһуохайдьыт, тойуксут Никифор Иванов -Сыҕаан, ити курдук киһи ааттыы туруон сөп.
Елена ПОТОЦКАЯ, «Саха сирэ» хаһыат, edersaas. ru