«Сургутнефтегаз» хампаанньа сылы хайдах түмүктээн эрэрий?
Коронавирус дьаҥынан үөскээбит уустук санитарнай-эпидемиологическай балаһыанньа бүрүүкээбитин үрдүнэн, 2020 сылга “Сургутнефтегаз” ПАУо Саха сирин сиригэр-уотугар бары көрдөрүүлэрин толордо. Бу туһунан ахсынньы 22 күнүгэр СӨ Ил Дархана Айсен Николаев ыыппыт мунньаҕар этилиннэ.
“Сургутнефтегаз” ПАУо генеральнай дириэктэрин солбуйааччы Александр Оглы иһитиннэрбитинэн, 2020 сыл түмүгүнэн Саха сиригэр ньиэби хостооһун 9 мөл 884 тыһ. туоннаҕа, дьөлө үүттээһин кээмэйэ – 324 тыһыынча миэтэрэҕэ тэҥнэһэр.
Бу сыл 9 ыйын түмүгүнэн инвестиция кээмэйэ 18 млрд 482 мөл солкуобай. 2020 сыл түмүгүнэн инвестиция кээмэйэ сүрүн хапытаалга 25,8 млрд солкуобайга тэҥнэһэрэ күүтүллэр.
Билигин “Сургутнефтегаз” ПАУо сир баайдаах бас билэр 21 учаастактаах, балар Булуҥ, Ленскэй, Мииринэй, Өлүөхүмэ, Сунтаар оройуоннарыгар бааллар. Хостооһун Ленскэй оройуонугар ыытыллар.
Хампаанньа кэнники сылларга олохтоох дьону үлэлэтиигэ улахан үлэни ыытар. Билигин хампаанньа эбийиэктэригэр 1550 олохтоох киһи үлэлиир. Хампаанньа салгыы орто оскуоланы бүтэрээччилэри бырамыысыланнас идэлэригэр уонна производство исписэлиистэригэр үрдүк үөрэххэ ыытарга үлэлэһиэҕэ.
Айсен Николаев “Сургутнефтегаз” ПАУо бэйэтэ үлэлиир сиригэр-уотугар социальнай-экэнэмиичэскэй сайдыыга сабыдыаллыырын, нолуок киириитин хааччыйар дьоһун тэрилтэ буоларын бэлиэтээтэ. “АЛРОСА” (ПАУо) АК кэнниттэн “Сургутнефтегаз” АУО өрөспүүбүлүкэ түмүллүбүт бүддьүөтүгэр үбү киллэриигэ иккис бөдөҥ хампаанньанан буоларын бэлиэтээтэ.
“Саха сирин сиригэр-уотугар хампаанньа туруктаах үлэтин боппуруостара өрөспүүбүлүкэ бырабыыталыстыбатын хонтуруолугар туруохтаахтар. Быйыл тиһиктээх үлэ түмүгэр “Сургутнефтегаз” өрөспүүбүлүкэ түмүллүбүт бүддьүөтүгэр үп дьоһуннук киириитин хааччыйар кыахтанна”, — диэн эрэгийиэн баһылыга бэлиэтээтэ.
Кини кэлэр 2021 сылга хампаанньа эрэгийиэн экэниэмикэтин бөҕөргөтүүгэ, үлэлиир сирин-уотун сайыннарыыга, саҥа баайдаах сири баһылааһыҥҥа, олохтоох каадырдары үлэҕэ ылыыга соруктарын толоруо диэн эрэнэрин биллэрдэ.
СӨ Ил Дарханын уонна Бырабыыталыстыбатын пресс-сулууспата
Андрей Сорокин хаартыската
Бэлэмнээтэ Женни Стрюкова.