2019 сыллаахха өрөспүүбүлүкэ үрдүнэн мэдиссиинэ 10 саҥа эбийиэгэ тутуллан, билигин үлэлии тураллар. Бу туһунан СӨ Доруобуйаҕа харыстабылын министэристибэтин пресс-сулууспата иһитиннэрэр.
2020 сылга өссө биэлсэр-акушер пууна, амбулатория дьиэтэ, барыта 18 тутуу ыытыллара былааннанар. Бүгүҥҥү туругунан мэдиссиинэ алта модульнай эбийиэгэ Эдьигээн улууһугар Баахынайга, Үөһээ Бүлүүгэ Тамалакааҥҥа, Ньурбаҕа Хорулаҕа, Хаҥаласка Сиинэҕэ, Усуйаанаҕа Дьүкээгиргэ, Томпо улууһугар Охотскай Перевоз бөһүөлэгэр тутулла тураллар. Ону таһынан, Үөһээ Дьааҥыга Баатаҕайга 180 киһи көрдөрүнэр 30 куойка-миэстэлээх поликлиниката тутулла турар диэн Доруобуйа харыстабылын миниистирэ Елена Борисова иһитиннэрэр.
Дьокуускайга 180 миэстэлээх, 201 ыарыһах биирдэ тэҥинэн көрдөрүнэр, искэн ыарыһахтары эмтиир диспансер иккис уочарата тутулла турар. 2019 сылтан Кардиология киинин иккис уочаратын тутуу саҕаламмыта.
Ньургуйаана Иванова, “Саха сирэ” хаһыат, edersaas.ru
Хаартыска интэриниэттэн