2020 сыл: хас биэссэр-акушер пууна уонна амбулатория үлэҕэ киллэрилиннэ?
«Доруобуйа харыстабыла» национальнай брайыагынан Саха сиригэр 2020 сылга 13 биэссэр-акушер пууна уонна амбулаториялар үлэҕэ киллэрилиннилэр.
Төһө да хоруона хамсыга туран харгыстары үөскэппитин иһин, «Доруобуйа харыстабыла» национальнай бырайыагынан бастакы мэдиссинискэй-санитарнай көмөнү оҥоруу хаачыстыбатын уонна тоҕоостоох буоларын үрдэтии үлэтэ ааспыт сылга биир да күн тохтообокко тиһиктээхтик салҕанна.
Ол түмүгэр, 2020 сылга өрөспүүбүлүкэ 16 оройуонугар уонна Дьокуускай куорат таһыгар барыта 13 биэссэр-акушер пууна уонна үс амбулатория үлэҕэ киллэрилиннэ. Биэссэр-акушер пууннара уустук суоллаах-иистээх нэһилиэнньэлээх пууннарга: Эдьигээн оройуонугар Баахынайга, Өлүөхүмэҕэ Урицкайга, Томпоҕо Охотскай-Перевозка уонна Усуйаанаҕа Дьүкээгиргэ аһылыннылар.
Сыл устатыгар 287 санитарнай рейс оҥоһулунна, 413 пациент эвакуацияланна. Мэдиссиинэ чэбдигирдэр көрүүтүгэр 225 тыһыынча киһи хабылынна. Мэҥэ Хаҥалас улууһугар Майа сэлиэнньэтигэр бөртөлүөт түһэр былаһаакката үлэҕэ киллэриллибитэ.