Айсен Николаев 202 №-дээх уурааҕы тохтотор туһунан эттэ...
· - Олох-дьаһах

Айсен Николаев 202 №-дээх уурааҕы тохтотор туһунан эттэ

Айсен Николаев өрөспүүбүлүкэ бырабыыталыстыбатыгар “Саха Өрөспүүбүлүкэтин социальнай инфраструктуратын эбийиэктэрин дьоҕус тиһигин структуратын уонна параметрдарын стандартарын туһунан” 202 №-дээх уурааҕы тохтотор туһунан сүбэлээтэ. Бу туһунан Саха сирин баһылыга Депутатскайга Усуйаана улууһун социальнай-экэнэмиичэскэй сайдыытыгар сүбэ мунньах түмүктэринэн эттэ, диэн СИА иһитиннэрэр.

“Саха Өрөспүүбүлүкэтин социальнай инфраструктуратын эбийиэктэрин дьоҕус тиһигин структуратын уонна параметрдарын стандартарын туһунан” 202 №-дээх уураах мунньах кэмигэр киирбит боппуруостартан биирдэстэринэн буолла. Саха сирин Ил Дархана ааспыт сыл бэс ыйыгар ылыныллыбыт уонна сүбэлиир майгылаах уураах кэккэ министиэристибэлэр өйдөтөр-быһаарар үлэни ситэ ыыппатахтарыттан уонна сорох уопсастыбаннай тэрилтэлэр уонна бэлитиичэскэй баартыйалар тиэрэ өйдөбүлү биэрбиттэриттэн таах дьон тылыгар киирэн биэрдэ диэтэ.

“Биһиги 202 №-дээх уурааҕы эмиэ дьүүллэспиппит. Өскөтүн Усуйаана оройуонугар бу уурааҕы толордоххо, бүддьүөт үлэһиттэрин ахсаана аччаабат, төттөрүтүн 40 киһинэн элбиир”, — диэтэ кини.

Ити эрээри Саха сирин баһылыга маннык көрүҥнээх уурааҕы тохтотуохха диэн эттэ.

“Мин Саха сирин бырабыыталыстыбатын бэрэссэдээтэлэ Владимир Солодовка сүбэлиир көрүҥнээх 202 №-дээх уурааҕы тохтоторго этии киллэриэм. Бу оннугар 2019 сыл балаҕан ыйын 1 күнүгэр диэри өрөспүүбүлүкэ хас биирдии оройуонугар чопчу быһаарыы суруллубут саҥа уураах тахсыахтаах”, — диэтэ Айсен Николаев.

Маныаха Саха сирин баһылыга Саха сирин бырабыыталыстыбата бүддьүөт эйгэтин силигин ситэриинэн салгыы дьарыктаныа диэн бэлиэтээтэ. Бу үлэ быдан көдьүүстээх буоларын туһугар “Саха сирин олохтоохторо нус-хас уонна көмүскэллээх буолалларын туһугар” гражданскай уопсастыбаны кытта ыкса ситимнээхтик ыытыллыахтаах.

“Туһата суох бүддьүөт тэрилтэлэрин ахсаанын аччатыы, бүддьүөт эйгэтигэр салайар персоналы аҕыйатыы бэлиитикэтин син-биир ыытыахпыт, тоҕо диэтэххэ, бу кэм ирдэбилэ. Бүддьүөт хас биирдии солкуобайа көдьүүстээхтик ороскуоттаныахтаах уонна биһиги олохтоохторбутугар туох-ханнык иннинэ туһаны аҕалыахтаах”, — диир Ил Дархан.

Андрей Сорокин.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

14 − три =