Үүнэр 2019 сыл бэлиэтэ саһархай дьүһүннээх Сир Сибиинньэтэ. Кытай халандаара этэринэн, Сибиинньэ сыла олунньу 5 күнүттэн тохсунньу 24 күнүгэр диэри бэйэтин быраабыгар киирэр эбит.
Илиҥҥи итэҕэлинэн, Сибиинньэ уон икки сыллаах эргиири түмүктүүр бэлиэ, онон бу сылга киһи уон икки сыл устата олорбут олоҕун, тугу сыыспытын эбэтэр таппытын ырытан-ырыҥалаан, өйүн-санаатын сааһылаан, инники былааннары туруорунара табыгастаах. Сибиинньэ эппиэтинэстээх, тулуурдаах, үтүө санаалаах, саҥаҕа сонумсах кыыл буоларын быһыытынан, 2019 сыл дьиэ кэргэҥҥэ үчүгэй эркиннээх, хаһаайыстыба тэринэргэ табыгастаах, инньэ гынан үлэһит уонна эппиэтинэстээх дьон карьералара үрдүөн-үүнүөн сөп.
Сибиинньэ быһыылаах копилканы мээнэ оҥорботтор, онон бу сыл үп-харчы өттүнэн эмиэ табыгастаах, ол эрээри сыл бэлиэтэ ыһан-тоҕон аһыыр кыыл буолан, үпкэ-харчыга харыстабылаах буолар ордук.
2019 сылга ордук табыллар дьарыктар: харчыны мунньуу, оҕуруот аһын олордуу, сир аһын хомуйуу, дьиэни туттуу, олох-дьаһах усулуобуйатын тупсарыы.
Сибиинньэ сылыгар төрөөбүт биллиилээх дьон: Стивен Спилберг, Арнольд Шварцнеггер, Аманда Пит, Хиллари Клинтон, Ванга, Надежда Кадышева, Ксения Бородина, Юрий Жирков, Прохор Шаляпин.
Евдокия Слепцова, «Саха сирэ» хаһыат, edersaas.ru.