Саҥа дьыл кэнниттэн сыана туохха барытыгар хас да төгүл эбилиннэ. Хомунаалынай өҥө төлөбүрэ тохсунньуга – 1,7%, онтон от ыйын 1 күнүттэн муҥутаан – 4,8% үрдүөхтээх. Үгэс быһыытынан, ОДьКХ төлөбүрэ сылга биирдэ от ыйыгар үрдээччи, ол эрэн НДС нолуога 18% — 20% диэри эбиллэн, 2019 сыл саҥатыгар тарыып 1,7% улаатта. Харчытыгар таһаардахха, дьиэ кэргэн бүддьүөтүгэр ити улаханнык охсуо суоҕа эрээри, сыаналаах тиэхиньикэни, миэбэли, дьиэни атыылаһарга НДС нолуога үрдээбитэ ороскуота сүүһүнэн тыһыынчаҕа тиийэ биллиэҕэ.
edersaas.ru
Оттон хамнас сыана үрдүүрүгэр төһө эппиэттэһэрий? Биллэрин курдук, дойду бэрэсидьиэнэ В.Путин ыам ыйынааҕы ыйааҕар олоҕуран, былырыын доруобуйа харыстабылын үлэһиттэригэр хамнас 100-200%, үөрэх эйгэтигэр учууталларга, оҕо саадын иитээччилэригэр 100% үрдээбитэ. Бүддьүөттэн хамнастанар атын салаа үлэһиттэригэр хамнас 2018 сылга 4% эбиллибитэ. 2019 сылга кинилэр хамнастара эмиэ 4% улаатыаҕа. Ол туһунан СӨ үбүн миниистирэ Валерий Жондоров иһитиннэрдэ.
Сахастат көрдөрүүтүнэн, 2018 сыл бастакы аҥаарыгар өрөспүүбүлүкэҕэ орто хамнас ааҕыллыыта 65833 солк. тэҥнэспитэ. Статистика этэринэн, саамай үрдүк хамнастаах дьон алмаас бырамыысыланнаһыгар (орто хамнас 119 931 солк.), ньиэп, гаас эйгэтигэр (орто хамнас 89 278 солк.), энергетикаҕа (орто хамнас 74 319 солк.), доруобуйа харыстабылыгар (орто хамнас 66 323 солк.), бибилэтиэкэҕэ (орто хамнас 58 322 солк.) үлэлииллэр.
Саамай үрдүк хамнас дойду киин куораттарыгар Москваҕа уонна Санкт-Петербурга төлөнөр. Холобур, программистар 100 -110 тыһыынчаны ылаллар. Ол иһин үөрэхтэрин бүтэрбит эдэр дьон үксүн онно хаала сатыыллар.
Марианна ТЫРТЫКОВА, «Саха сирэ» хаһыат, edersaas.ru