«Үбүлээһинэ тохтооботоҕуна, биһиги 2018 с. Бэрдьигэстээххэ диэри асфальт суолу баар оҥоруохпут», — диэн кэпсиир «Бүлүү» суолун управлениетын салайааччыта Николай Андреев Ил Дархан алтынньы 27 күнүгэр Горнайга сырыытын кэмигэр.
Ыспыраапка быһыытынан эттэххэ, быйыл сайын бу суолга үс сиринэн өрөмүөн үлэтэ барда. Манна үс тэрилтэ, «СУ-888», «Дорисс», «Сельдорстрой», бэдэрээттэһэн үлэлээтэ. Тэрилтэлэр үлэлэригэр сыһыаран эттэххэ, асфальт ууруутугар саҥа технология туһанылынна. Урукку өттүгэр Саха сиригэр бу маннык технология туһанылла илигэ. Онон, биир өттүнэн, «Бүлүү» суолун управлениета саҥа, сонун технологияны өрөспүүбүлүкэбитигэр ситиһиилээхтик киллэрдэ.
Ити күн Егор Борисов: «Саха сиригэр бу суол оҥоһуллуута улахан суолталаах. Бүлүү суола Саха сирин Иркутскай уобалаһын кытары ситимниэҕэ», — диэн бэлиэтээн эппитинии, Горнай улууһун, ону ааһан Саха сирин историятыгар, кылгас эрээри, улахан суолталаах кэрчик арылынна.
Онон аҕыйах сыллааҕыта Горнай суола суох олорбут буоллаҕына (холобур, Аһыма Орто Сурт икки ардыгар суол 2000 эрэ сыллаахха оҥоһуллубута), аны икки сылынан олохтоохтор Дьокуускайга диэри асфалынан сылдьыахтара. «Биһиги Ил Дархаҥҥа Егор Борисовка улахан махтааллаахпыт. Бырабыыталыстыба бэрэссэдээтэлинэн олорон, Бүлүү суола федеральнай статуһу ыларын ситиспитэ. Онон баара-суоҕа уонча сыл иһигэр суолбут-ииспит тупсан олохпут-дьаһахпыт биллэ уларыйда», — диэн бэлиэтиир Горнай улууһун баһылыга Никита Андреев.
Ыспыраапка: Эһиил Аһыматтан Бэс Күөлүгэр диэри суол оҥоһуллуохтаах. Ону сэргэ Орто Суртан Кэптиҥҥэ диэри айан суола саҥардыллыахтаах. Онон Горнай 85 сыллаах үбүлүөйүн суолун, сибээһин тупсарынан, үгүс дьиэни-уоту тутан көрүстэ.