Бэҕэһээ Москваҕа буолбут Арассыыйа боксаҕа бэдэрээссийэтин мунньаҕар 2018 сылга Бүтүн Арассыыйатааҕы, дойдуга бастыыр иһин күрэхтэһиилэри итиэннэ Арассыыйа чөмпүйэнээтин ханна ыытары дьүүллэстилэр.
edersaas.ru
Мунньахха Арассыыйа 2018 сыллааҕы эр дьоҥҥо чөмпүйэнээтин Дьокуускай куоракка ыытарга быһаарыы ылыныллынна.
Дьахталлар чөмпүйэнээттэрэ Улан Удэҕэ (Бурятия), Арассыыйа Кубога Ижевскайга (Удмуртия), уолаттар уонна кыргыттар күрэхтэһиилэрэ Анапаҕа, Тюмеҥҥа, Сыктывкарга ыытыллыахтара диэн буолла.
Дойду чөмпүйэнээтэ Дьокуускайга быһа холоон алтынньы ый бүтүүтэ буолара сабаҕаланар. Бу күрэхтэһии түмүгүнэн Европа чөмпүйэнээтигэр кыттар Арассыыйа хамаандата сүүмэрдэниэҕэ. Онон, Ил Дархан Егор Борисов уурбут сырата тилиннэ диэххэ сөп.
Санатар буоллахха, дойду чөмпүйэнээтэ кэлин Дьокуускайга 2007 сыллаахха ыытыллыбыта. Онно Георгий Балакшин 51 киилэҕэ диэри ыйааһыҥҥа кыһыл көмүс мэтээли ылбыта. Дмитрий Винокуров (49 кг), Семен Степанов (51 кг), Николай Дмитриев (54 кг), Афанасий Поскачин (57 кг) уонна Вадим Лихман (91 кг) боруонса призердарынан буолбуттара.
Роман Попов, “Саха сирэ” хаһыат, edersaas.ru