2017 сыл уон бастыҥ спортсменын аата билиннэ

Ахсынньы 22 күнүгэр  «Триумф» Спорт киинигэр буолбут «Чөмпүйүөннэр баалларыгар» 2017 сыл бастыҥ спортсменнарын ааттаатылар. 

edersaas.ru

1. Василий Егоров — бокса, спорт үтүөлээх маастара, Европа 42-с чөмпүйэнээтин кыайыылааҕа, Дублиҥҥа, Хельсинкигэ ыытыллыбыт норуоттар икки ардыларынааҕы турнирдар кыайыылаахтара. Тириэньэрэ — Артур Пахомов.
2. Виктор Рассадин — көҥүл тустуу, норуоттар икки ардыларынааҕы кылаастаах спорт маастара, Арассыыйа чөмпүйэнээтин үрүҥ көмүс призера, Дмитрий Коркин кэриэһигэр Гран-при турнирын кыайыылааҕа, Иван Ярыгин кэриэһигэр Гран-при турнирын үрүҥ көмүс призера, Европа нацияларын Кубогын — АЛРОСА Кубогын кыайыылааҕа. Тириэньэрэ — Иван Дмитриев.
3. Михаил Саввинов — киирэ спорда, норуоттар икки ардыларынааҕы кылаастаах спорт маастара, Арассыыйаҕа бастыыр иһин күрэхтэһии боруонса призера, устудьуоннар ортолоругар Арассыыйа чөмпүйүөнэ, ыччаттар ортолоругар Европа чөмпүйэнээтин кыайыылааҕа, аан дойду Кубогын түһүмэҕин чөмпүйүөнэ, ХХ-с Манчаары оонньууларын муҥутуур кыайыылааҕа. Тириэньэрэ — Василий Дьячковскай.
4. Максим Афонин — чэпчэки атлетика, норуоттар икки ардыларынааҕы кылаастаах спорт маастара, «Русская зима» чэпчэки атлетика турун кыайыылааҕа, дьиэ иһигэр Арассыыйа чөмпүйүөнэ. Тириэньэрэ — Николай Колодко.
5. Сардаана Трофимова — чэпчэки атлетика, норуоттар икки ардыларынааҕы кылаастаах спорт маастара, Москватааҕы марафон кыайыылааҕа. Тириэньэрэ — Татьяна Жиркова.
6. Айаал Макаров — спортинг, норуоттар икки ардыларынааҕы кылаастаах спорт маастара, Арассыыйа спортиҥҥа Кубогын бастакы уонна иккис түһүмэхтэрин дублетка, компакка кыайыылааҕа, Арассыыйа спортиҥҥа чөмпүйэнээтин, Кубогын үрүҥ көмүс призера, Европа чөмпүйэнээтин үрүҥ көмүс призера.
7. Евгения Тимофеева — оҕунан ытыы, спорт маастара, Арассыыйа Кубогын үрүҥ көмүс призера, Европа чөмпүйэнээтин үрүҥ көмүс призера. Тириэньэрэ — Владимир Тимофеев.
8. Матрена Ноговицына — дуобат, аан дойдутааҕы гроссмейстер, сүүс харахтаах дуобакка блицкэ аан дойду чөмпүйүөнэ, блицкэ аан дойду Кубогын кыайыылааҕа, Пекиҥҥэ ыытыллыбыт бүтүн аан дойдутааҕы интеллектуальнай оонньуулар үс төгүллээх чөмпүйүөннэрэ. Тириэньэрэ — Николай Кычкин II.
9. Гаврил Колесов — дуобат, аан дойдутааҕы гроссмейстер, нуучча дуобатыгар Арассыыйа чөмпүйэнээтин биирдиилээн уонна хамаанданан түмүккэ чөмпүйүөнэ, нуучча дуобатыгар аан дойду чөмпүйүөнэ. Тириэньэрэ — Александр Азаров.
10. Иван Пестряков — сахалыы атах оонньуулара, спорт маастара, өрөспүүбүлүкэтээҕи турнирдар, күрэхтэһиилэр хас да төгүллээх чөмпүйүөннэрэ, ХХ-с үбүлүөйдээх Манчаары оонньууларын муҥутуур кыайыылааҕа. Тириэньэрэ — Андрей Федоров.

Роман Попов, «Саха сирэ» хаһыат, edersaas.ru