Ааһан эрэр сылга ураты ситиһиилээх, норуокка киэҥник биллибит, интернеккэ элбэхтик ырытыллыбыт дьону таһаарабыт.
Дьоруой Назарий
“Якутскэнерго” ХЭТ Намнааҕы филиалын маастара 12 киһини өлөр өлүүттэн быһаабыта. Назарий Необутов диэн эдэр киһи атын дэриэбинэҕэ наадаҕа бара сылдьыбыт, онтон төннөн истэҕинэ массыынатын билбэт дьоно тохтоппуттар. Назарий туох элбэх киһитэ муһуннаҕай диэн дьиктиргээбит, ол эрээри көмөҕө наадыйан тохтоттохторо диэн тута санаатын уларыппыт. Массыыналара улаханнык алдьанан, кыһыҥҥы тымныыга сир-халлаан икки ардыгар хаалбыт дьон буолан биэрбиттэр. Онон наадалаах кэмҥэ Назарий оруобуна кэлэн, 12 киһи олоҕун быһаабыта.
Күүстээх санаалаах Лаптев
«Мэһэйэ суох хамсааһын» («Движения без барьеров») өрөспүүбүлүкэтээҕи уопсастыбаннай тэрилтэ салайааччыта Афанасий Лаптев быйыл ситиһиитэ элбэх. «Харысхал» пуонданы кытта инбэлииттэргэ аналаах элбэх тэрээһини, сэминээри ыытар, хамсанарыгар хааччахтаах дьоҥҥо куорат тэрилтэлэрин дьиэтэ төһө табыгастааҕын бэрэбиэркэлиир. Социальнай ситимҥэ барытын суруйан иһэр. Сэтинньигэ Подмосковьеҕа буолбут семинар түмүгүнэн Инбэлииттэр бүтүн арассыыйатааҕы уопсастыбаларын кытта дуогабардаста. Саха сиригэр «Системы добровольной сертификации» экспертнэй киини арыйар туһунан. Итиэннэ быйыл Афанасий Лаптев ыал буолбутун үөрэ иһиттибит. Саҥа дьиэ кэргэҥҥэ саҥа сылга дьолу, тапталы, табыллыыны баҕарабыт.
Чөмпүйүөн Lil’Di
Быйыл Lil’Di Диана Егорова «Respect my Talent» күрэхтэһиигэ хип-хоп үҥкүү хайысхатыгар Арассыыйа чөмпүйүөнэ буолбута. «Zavod» үҥкүүһүтэ 13 саастаахтарга диэри бөлөххө киирсибитэ. Манна кыттыбыт оҕолор үҥкүү бу хайысхатын төрүттээччи Генри Линка (АХШ) маастар-кылааһыгар сылдьыбыттара. Кини бэйэтэ дьүүллүүр сүбэҕэ баара. Диананы кыайыытынан эҕэрдэлээбитэ. Диана 13 сааһын туолла, онон салгыы бу хайысхаҕа кыттыбат.
Күүстээх Виталий
Саха сиринээҕи пауэрлифтинг федерациятын бэрэсидьиэнэ Виталий Данилов экипировката суох жимҥа Америка холбоһуктаах штаттарын чөмпүйүөнэ буолбута. Тэрээһин Орегон штатын Портленд куоратыгар ыытыллыбыта. Салгыы Виталий Луизиана штатын Батон Руж куоратыгар Бүтүн аан дойдутааҕы чемпионат боруонса мэтээлин ылбыта. Бастакы миэстэҕэ американец, иккискэ – Канада спортсмена тахсыбыттар. Билигин пауэрлифтер 2017 сылга Азербайджаҥҥа буолуохтаах Аан дойду чемпионатыгар күүстээхтик бэлэмнэнэр. Америка дьоно, киинэлэртэн даҕаны көрдөххө, ыараханы көтөҕүүгэ “маастардар”. Саха мадьынылара тимири кытта эриһэн, аан дойду таһымнаах ситиһиилэнэллэрэ үөрүүлээх.
Көмүс куоластаах Арина уонна Инна
Саха сириттэн төрүттээх Москва куоракка олохсуйбут Инна уонна Арина Даниловалар СТС ханаал ыытар “Два голоса” диэн дьиэ кэргэн дуэттарын шоутугар кыайбыттара. Ийэлээх кыыска бириис быһыытынан биир мөлүйүөн солкуобайы биэрбиттэрэ. Даниловтар дьиэ кэргэн сүбэлэһэн баран, харчыны искэн ыарыылаахтар пуондаларыгар тиксэрбиттэрэ. Сайын “Голос. Дети” бырайыак кыттыылаахтара Арина Данилова уонна Данил Скрипник Дьокуускайга кэлэн “Азия оҕолоро” спортивнай оонньуу чэрчитинэн кэнсиэртээбиттэрэ.
Хаастаах Анжелика
Сүүһүн аҥаарын бүтүннүү хаас гына уруһуйдаммыт Анжелика Протодьяконованы ситиһиилээх даҕаны буолбатар, интернет эйгэтигэр быйыл “тыас таһаарда” диэххэ сөп. Калифорния биллэр визажиһа Sadia Slayy, ТНТ ханаал «Comedy Club» шоутун резиденэ Марина Кравец, бэйэбит «сулустарбыт» саха кыыһын үтүктэн хаастарын кырааскаланнылар. Таксилар, араас тэрилтэлэр Анжелика хааһын үтүктүбүт дьоҥҥо чэпчэтии акцияларын биллэрдилэр. Дьокуускай кулууптарыгар хаста даҕаны уруһуй хаас тиэмэлээх биэчэр буолла. Бэл, хаастаах кыыс куукулатын оҥордулар. Анжелика бэйэтэ реклама арааһыгар уһулунна, кылгас кэм иһигэр инстаграмҥа 31 тыһ.тахса сурутааччыланна. Кыыһы үөҕэр даҕаны, өйүүр даҕаны дьон элбэх. edersaas.ru