Бэҕэһээ суруналыыстар Горнай улууһун Бэс Күөлүттэн оптуобуһунан төннөн иһэн, Күөрэлээх нэһилиэгин диэки, ойуур баһаара имири салаан ааспыт сиригэр кырачаан бэстэри олордуу үгэнигэр түбэспиттэрэ.
Тэрээһин туһунан Горнайдааҕы ойуур хаһаайыстыбатын исписэлииһэ Ирина Алексеева: “Бу Күөрэлээх-Аһыма суолун 25-с биэрэстэтигэр Тукулааччы диэн күөл аттыгар турабыт. «Сохраним лес” диэн Арассыыйа таһымнаах аахсыйа буола турар. Тэрээһин Саха сиригэр Нерюнгригэ атырдьах ыйын 25 күнүттэн саҕаламмыта.
Салгыы эстафетаны биһиги тутан, бу тэрийэ сылдьабыт. 2000 кырачаан бэһи Хабаровскайтан «Растим лес” диэн хампаанньа ыыппыта. Тэрээһиҥҥэ улуустааҕы лесничество 4 оскуолатын үөрэнээччилэрэ, “Сиинэ” аан айылгы паарка үлэһиттэрэ, улуустааҕы айылҕа харыстабылын исписэлиистэрэ, Горнай улууһун олохтоохторо кытта сылдьаллар. Бу сиргэ 2002 сыллаахха улахан ойуур баһаара буолбута. Анал тиэхиньикэлэринэн сирин-уотун ыраастаан баран, 2000 кырачаан бэһи олордо сылдьабыт”, — диэн билиһиннэрдэ. Бу үтүө дьыалаҕа суруналыыстар эмиэ кыттыһан, 30-тан тахса кырачаан бэһи үөрэ-көтө олордон, күөх дуолбутун чөлүгэр түһэриигэ сэмэй кылааппытын киллэристибит диэн астынан төннүбүттэрэ.
edersaas.ru