«Билайн» суотабай оператор 2019 сылга өрөспүүбүлүкэ 200 нэһилиэгин 4G холбоон, Сахабыт сирин олохтоохторун 85% үрдүк хаачыстыбалаах сибээһинэн, түргэн интэриниэтинэн хааччыйда.
«Ютуб»-ка, «Insta»-ҕа видео көрөргө мобильнай интэриниэттээх аныгы сибээс төрдүс көлүөнэтэ Амма, Хаҥалас, Уус Алдан, Нам, Мэҥэ Хаҥалас, Таатта, Чурапчы, Ньурба о.д.а. улуустарга, Дьокуускай кытыытыгар киирдэ.
Бүлүү бөлөх улуустара 4G холбонон, сибээс вышкаларын тутуу сыллааҕы былаана 30% аһары туолбут. Күн бүгүн өрөспүүбүлүкэ олохтоохторун 83% смартфоннаахтар, дойду үрдүнэн бу биир саамай үрдүк көрдөрүү. Хас биирдии иккис абонент 4G туһанар, биир киһи ыйга 14 ГБ кээмэйдээх трафигы хачайдыыр. Итинник тэтиминэн 25 сериялаах сериал көрүөххэ, 12 тыһыынча хаартысканы, сууккаҕа 24 чаас онлайн оонньуохха, муусука истиэххэ сөп.
Ол туһунан өрөспүүбүлүкэни 4G мобильнай сибээһинэн хааччыйыы түмүктэрин таһаарар мунньахха иһитиннэрдилэр. СӨ Инновациятын, цифровой сайдыытын уонна инфокоммуникационнай технологиятын миниистирэ Анатолий Семенов:
— Инникитин федеральнай айан суолун кыйа суотабай сибээс баар буоларын, 4G салгыы Өлөөҥҥө, Сааскылаахха киирэрин ситиһэргэ үлэлэһэбит. Улахан сирдээх, мөлтөх суоллаах-иистээх Сахабыт сирин аныгы сибээһинэн хааччыйбыт дьоҥҥо махталбытын тиэрдэбит. Билигин тыа дьоно судаарыстыбаннай өҥө электроннай порталынан, цифровой сервис киэҥ хайысхатын толору туһанар кыахтаныахтара, — диэтэ.
«Билайн» (“Вымпелком”) хампаанньа эрэгийиэннээҕи салаатын дириэктэрэ Ильгиз Азизов:
— 2012 сыллаахха өрөспүүбүлүкэҕэ 2G үлэлиир этэ, билигин 3000 базовай ыстаансыйабытын Алдаҥҥа туруордубут. 20-25 мБит түргэннээх интэриниэтинэн олохтоох нэһилиэнньэ 85% хааччыйдыбыт. Инникитин айан суолугар тырааныспар төһө туолбутун, массыына харыыта баарын-суоҕун иһитиннэрэр өҥөнү киллэриэхпитин баҕарабыт. Пенза уобалаһыгар оннук бырайыак номнуо олоххо киирбитэ. Манна тымныы тыйыс айылҕалаах ирбэт тоҥу көрө кэлэр айанньыттарга туох ханна баарын сырдатар ыйынньык ыытыахпытын сөп, — диэтэ.
Онон билигин тыа сиригэр интэриниэт харбакка үлэлиир, дьон ыарахан файллары түргэнник ыытар, социальнай ситимҥэ хаартыска угар, киинэ, видео көрөр кыахтаннылар. Дьон дьиэлэригэр олорон эрэ бырааска, оҕо саадыгар, оскуолаҕа суруттарыахтара, омук сиригэр тахсарга пааспар сакаастыахтара.
Марианна Тыртыкова, «Саха сирэ» хаһыат, edersaas.ru