Маны аах Тыа хаһаайыстыбата

200 бугуллаах кэбиһиилээх сүүнэ от

Хаартыскаҕа көрөр  сүүнэ оту Үөһээ Бүлүү улууһун Туобуйа нэһилиэгин олохтооҕо Михаил Алексеев  кэбиспит. Кини Туобуйаттан үс көс ыраах сытар Балаҕаннаах диэн сиргэ сылгы баазатын тэриммит. Икки үөр сылгылааҕыр быйыл сайын соҕотоҕун алта оту оттообутуттан — биирэ ити 200 сүүнэ бугуллаах.

Михаил Алексеев Туобуйа баһылыга Степан Алексеев бииргэ төрөөбүт быраата буолар. Онон ыраах сайылыкка сытар киһини кытта кэпсэтэр кыаллыбат буолан, Степан Ивановичка эрийэн ыйыталастыбыт. «Быраатым  Балаҕаннаах диэн сиргэ базаланан икки үөр сылгыны иитэр. Сайын устата илиинэн соҕотоҕун оттуур. Быйыл алта оту оттоото. Биир ото 200 бугуллаах. Атыттара итинтэн арыый дьоҕустар. Ити от уһуна 9 м тахса, үрдүгэ 4 м кэриҥэ. Дьэ улахан от. Быраатым сайылыгар бэркэ диэн тэринэн олорор, дьиэ-уот мааны, күн уотуттан элэктэриичистибэни ылар анал тэриллээх  буолан,  спутниковай антыанна көмөтүнэн, «күөх экранынан»   сонуну-нуомаһы истэ, көрө олорор», — диэн Степан Иванович быраатын үлэтин туһунан  кылгастык сырдатта.

Маннык сүүнэ оту аныгы кэмҥэ мээнэ оттооботторо биллэр. Иһэ үллүбүтэ 100 бугуллаах буолаллар. 200 бугуллаах — бу дьиҥ былыргылыы оттооһун буолар.

 

 

 

0
0