Доруобуйа харыстабылын министиэристибэтэ бэс ыйыгар саҥа таһаарбыт «Облачная поликлиника» систиэмэтин нөҥүө 20 тыһыынчаттан тахса онлайн-консультация оҥоһулунна. Ол туһунан Өрөспүүбүлүкэтээҕи информационнай-аналитическай киин дириэктэрэ Аида Коростелева кэпсээтэ.
edersaas.ru
Бу бырайыак көмөтүнэн дьон ыарыйдахтарына, балыыһаҕа бара сатаабакка, кимниин да алтыспакка, дьиэттэн да тахсыбакка эрэ быраастан быһаччы сүбэни-аманы ылыахтарын, эмп анатыахтарын сөп. Ону тэҥэ, “Медсеть” мобильнай сыһыарыыны хачайдаан баран, поликлиникаттан бырааһы дьиэҕэ ыҥырыахха сөп. Бу ордук поликлиника төлөпүөннэригэр кыайан эрийэн тиийбэт буоллахха, табыгастаах.
Бүгүҥҥү күҥҥэ “Облачная поликлиника” сервискэ Дьокуускай куорат уонна киин улуустар бары балыыһалара холбоннулар. Чааһынай килииникэлэр холбоһон эрэллэр. Барыта 647 быраас холбоммута, кинилэр бу кэм устата 20 тыһыынчаттан тахса онлайн-консультацияны оҥордулар. 15 тыһыынча киһи сыһыарыыны хачайдаан, туһанар. Өрөспүүбүлүкэ олохтоохторо бары бу сыһыарыынан туһаныахтарын сөп.
Сайын күҥҥэ 20 киһи консультация ылар буоллаҕына, билигин 300-чэ киһи туһанар. Ол иһин поликлиникалар уонна “суһал көмө” нүөмэрдэригэр эрийии ноҕурууската аҕыйаата. Күһүн “суһал көмөҕө” күн аайы 20 тыһыынчаҕа тиийэ эрийэр буоллахтарына, билигин биллэ аҕыйаата.
Хайдах суруйтарыахха сөбүй?
Төлөпүөҥҥэ “Облачная поликлиника” мобильнай сыһыарыыны хачайдыыгыт. Күн аайы ыарыыгыт туһунан кэтээн көрүү күннүгэр суруйан иһэҕит. Быраас маны көрөр уонна телемэдиссиинэ көмөтүнэн консультация бириэмэтин аныан сөп. Эрийэн тиийэр, эбэтэр «чатка» суруйар, кэпсэтэр. Оттон ханнык да балыыһаҕа, поликлиникаҕа сыһыарыллыбатах буоллаххытына, доруобуйа харыстабылын министиэристибэтин дьоҥҥо көмөлөһөр уонна арыаллыыр киинин дьуһуурунай оператора үлэлэһэр.
Бу сыһыарыылар нөҥүө киирбит этиилэри үөрэтэн баран, саҥа уларыйыылары киллэрэн иһэллэр. Холобур, күһүөрү оҕо саадтарыгар, оскуолаларга ыспыраапкалары ылыы элбээбит кэмигэр, “ыспыраапканы ылыы” сервис киллэриллибитэ. Онтон чэпчэтиилээх эмтэри ылар дьоҥҥо ырыссыаптары биэрии боппуруоһа күөрэйбитэ. Онон манна эбии сервис киирбитэ. Ону тэҥэ, Роспотребнадзор управлениетыгар аналлаах сервис баар буолбута. Коронавирустаах киһини кытары хантаактаспыт дьон бу сервис нөҥүө дьиэҕэ хааччахтанан олоруу туһунан суругу ылыахтарын сөп.
Онон, пандемия кэмигэр бу туһалаах сыһыарыын ылан туһаныҥ.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru