Ол туһунан Үүнэр көлүөнэ тус сыаллаах пуондатын генеральнай дириэктэрэ Владимир Егоров кэпсээтэ.
— Кэнники 20 сылга өрөспүүбүлүкэ үгү улуустарыгар, куораттарыгар барыта 238 оскуола, 242 уһуйаан тутулунна. Улуустарынан айаннаан иһэн көрдөххө, бэл, кыра нэһилиэктэргэ аныгылыы көстүүлээх, хааччыллыылаах таас оскуолалар тутуллан, үлэлии тураллар. Оскуола нэһилиэк олоҕун киинэ буолара, сайдыыны аҕалара саарбаҕа суох, — диэн кини эттэ.
Ону тэҥэ, үөрэҕирии эйгэтин интэриниэккэ холбооһун тэтимнээхтик барда. Саха сиригэр 500-тэн тахса оскуола уонну уһуйаан түргэн интэриниэккэ холбоннулар, көмпүүтэр кылаастарын хааччыллыытын таһыма үрдээтэ.
— Интэриниэт холбонон, учууталлар эбии үөрэнэрбитигэр усулуобуйа баар буолла. Үөрэтии саҥа ньымаларын, уларыйыылары билэ охсон, таһыммытын үрдэтэбит. Ханнык баҕарар уустук боппуруоска харданы түргэнник буларга, сайдарга көмөлөөх, — диэн Өлөөнтөн нуучча тылын, литературатын учуутала Мария Исакова кэпсиир.
Өрөспүүбүлүкэҕэ үөрэх тэрилтэлэрин интэриниэккэ холбооһун “Цифровая экономика” национальнай бырайыак чэрчитинэн ыытыллар. 2021 сыл бүтүөр диэри 453 оскуолаҕа, техникумҥа, колледжка интэриниэт холбонуутун тупсарар үлэ ыытыллыаҕа.
Ангелина Васильева, “Саха сирэ” хаһыат, edersaas.ru